Vijayawada, ïaïong:
Ka shuki Rajya Sabbha kaba la thylli na Andhra Pradesh, ka long kaba lah ban pyndap da u kyrtong na ka BJP. Ïa kane la rai ha ka jingïalang kaba la long hapdeng u Myntri Rangbah ka jylla u N Chandrababu Naidu bad u Myntri ka tnat ki kam pohïing ka sorkar pdeng u Amit Shah ha ka sngi Ba-ar ha New Delhi.
Katkum ka khubor ba la wan na ka seng BJP, u Amit Shah u la pynpaw ba u kwah ban pynïeng kyrtong ka BJP na ka bynta ka shuki ba marwei jong ka Rajya Sabha na katei ka jylla, bad la ong ba u Naidu u la mynjur ïa katei ka jingtyrwa. Ka jingpynbna kaba thikna ha kane ka bynta ka lah ban mih ha bakut jong kane ka taïew.
Da ka jingmynjur jong ka TDP ban ailad ïa kawei ka jaka kaba lait kaba mih ha Rajya Sabbha sha ka seng ba la ïatreilang jong ka BJP, ka jingkynnoh ka la jur bha ha Tamil Nadu ba u K Annamalai, uba dang shu hiar shuki kum u President jong ka BJP ha TN, u lah ban shah jied ha katei ka shuki na Rajya Sabbha.
Hynrei ki tyllong khubor kiba ïajan bad u Annamalai, ki ïathuh ba ki nongïalam jong ka ri, kim pat shim ïa ka rai halor katei bad kham bunsien ki dei tang ki khubor hamsaïa ha kane ka por.
Halor ki jingkynnoh, u Ponguleti Sudhakar Reddy, uba long u National Co-incharge ka BJP na ka bynta ka TN, u la ong ha kawei na ki lad phah khubor kumne: “Lada ka jia, ka long kaba bha. Hynrei ka rai jong ki heh ka seng ka long kaba hakhliehduh namar ki daw bapher bapher ki don bynta ha ka.”
U la kyntait ban kren shuh shuh ïa bun kiei kiei ha ka jingïakren bad ki nongthoh khubor.
