Bengaluru, ïaïong:
Naba ka BJP ka ïalap pyrshah ïa ka jingwad bniah ïa ki jaitbynriew, bad da kaba kam ba ka kaiphot tynrai ka la jah, u Myntri Rangbah ka jylla u Siddaramiah u la ther ïa ka liang pyrshah namar ba ki ïaleh pyrshah ïa ka jingshisha jong ka kaiphot.
U la ong ba ka BJP kam don hok ban kdew ïa katei ka kaiphot, namar ba la ai da u Chairman ka Backward Classes Commission u Jayaprakash Hegde, ïa uba la thung da ka sorkar BJP barim.
Halor ka jingkylli la ki nongïalam ka Congress ki la pynpaw ne em ïa ki jingpyrshah halor katei ka kaiphot, u Siddaramaiah u la kam ba kam don kano kano ka jingduna ha katei ka kaiphod, bad lada don yn sa pynbeit noh.
U la ong ba la bthah ïa ki Myntri ba kin ai jingmut, bad kin sa peit bniah ïa kane, bad yn sa shim ïa ka rai ha ka jingïalang ka kynhun Myntri ban wan.
Haba pyntip halor ka jingkynthoh jong ka BJP ba ka jingbun briew jong ki Muslim ka la kiew da 90 percent, haba ïanujor bad u snem 1984, katba ka jong ki Lingayat ka long tang 8 percent, u la ong ba u Hegde u la aiti ïa ka kaiphot katkum ki jingkheiñ jong ka jinglap jong ka Kantharaj Commission.
U la ïada shuh shuh ïa katei ka jingwad bniah, da kaba ong ba kan pynshai mano ba ïeng hangno, bad ka jinglong jingman jong ki jaitbynriew bapher bapher ki ban ktah ïa ka jingthaw ïa ki polisi.
Ha kawei pat ka bynta, u Siddaramaiah u la ong ba kam don jaka ban buh ïa ka ktien Hindi, namar ba ka don ka ‘policy ar tylli ki ktien’ ha ka jylla.
Haba la ïathuh shaphang uwei u ophisar jong ka IAF uba la thombor ïa kawei ka nong Karnataka ha Bengaluru, u Myntri Rangbah u la ong ba yn shim ïa ka rai katkum ka aiñ lada don mano mano ba leh bakla.
