Thiruvananthapuram:
U nongïalam ka liang pyrshah u V D Satheesan ha ka Sngi U Blei u la ther tyngeh ïa ka jingbteng jong u K M Abraham kum Chief Principal Secretary jong u Myntri Rangbah.
Ka Kerala High Court ka la bthah ïa ka CBI ban ujor da ka ejahar pyrshah ïa u Abraham namar ba u la lum ïa ki jingdon jingem bymhok ki bym ïahap bad ki lad kamai jong u kiba la tip. Ka Vigilance Department, hapoh ka jingïalam jong u Myntri Rangbah ka jylla, ka la pyrshang ban pyllait ïa u Abraham, hynrei ka ïingbishar ba ha khlieh duh ka la tuklar ban pynlong pat ïa ka jingtohkit jong ka CBI.
“Ka long ka jing-lehraiñ ïa ka jylla ba u K M Abraham, uba ïakynduh ïa ki jingkynnoh kiba jur, u dang sah ha kum kane ka kyrdan kaba kongsan. Namar ba u la bat ïa ka kam Chief Secretary kham mynshwa, mynta u dei ban iehnoh ïa ka kam lane ban weng noh ïa u,” la ong u Satheesan.
“Hato dei namar ka bynta jong u Abraham kum u nongsakhi ha ka mukotduma Lavalin ba u Myntri Rangbah u tieng ïa u?” u la kylli.
La kynnoh ruh ba u Abraham, ha ka shithi sha u Myntri Rangbah ka Jylla, u la kam ba u don ïa ki jingthoh jingtar jong ki briew ba kongsan bad u la kam ba u la donkti ha ka kam phone be-aiñ. “Hato ka jingsngaptuh ïa ka jingïakren phone ka dei ka bynta jong ki kam jong u Chief Principal Secretary ? U Ramakrishna Hegde, Myntri Rangbah ka Karnataka, u la iehnoh ïa ka kam halor ka jingkynnoh sngaptuh ïa ka jingïakren phone ha u snem 1988. Kaba sngewsih ka long ba ka CPM, kaba dawa ïa ka aiñ kaba pyrkhing pyrshah ïa ka jingsngap tuh ïa ka jingïakren phone, ka sngap jar haba ka sorkar jong ki hi ka donkti,” la kdew u Satheesan.
Wat la ka long kaba duna pisa, ka sorkar jylla ka pynlut palat 100 klur tyngka ha ka jingrakhe dap saw snem, katba ki tnad ka koit ka khiah ki hiar dor, ki dukan rashon ki dang thylli, ki jingsiew ban thied khaw ki dang sahteng, bad ki penshon jong ka imlang-sahlang ki dang slem.
U Myntri Rangbah ka jylla u dei ban pynsangeh noh mardor ïa kine ki jing-rakhe kibym larkem, la ong u nongïalam ka Congress.
U la pynpaw ruh ïa ka jingsngewkhia halor ki jingthung kam kiba heh kiba jia ha ka jylla, da kaba ïaid lait ïa ki thup kyrdan jong ka PSC, bad buh jingkylli ïa ki jingthmu ba kongsan jong ka bor synshar.
