New Delhi, ïaïong:
Ki shipai Pakistan, ki dang ïai bteng ban pynkheiñ ïa ka aiñ sangeh ïasiat ha shi lynter jong ka khappud LoC, da kaba pyndonkam da ki jingsiat khlem daw ha Poonch distrik bad Kupwara distrik jong ka Jammu & Kashmir, ong ki heh shipai, ong ka tyllong khubor ha ka lah sngi U Blei.
Kane ka dei ka miet kaba saw lynter ba ka Pakistan ka la pyndonkam ïa ka jingsiat khlem daw ha shi lynter ka Line of Control (LoC) bad kane ka la jia hapdeng ka jingïakynad kaba jur bha hapdeng ka New Delhi bad ka Islamabad hadien ka jingthombor jong ki lehnoh ha Pahalgam ha ka taïew ba la lah.
U nongaiktien jong ka tnad ïada ri u la ong ba ki jaka sah jong ki shipai Pakistan ki la sdang ban siat da ki tiar siat kiba kham rit khlem daw ha kylleng ka LoC ha ki jaka ba mar pyrshah ïa ki distrik Kupwara bad Poonch ha ka miet jong ka 27-28 tarik. Ïaïong, la ïathuh ka lad phah khubor.
Ki shipai India khlem da pynslem ki la pynphai kylla ïa ka jingsiat, la bynrap shuh shuh u nongaiktien, khlem da don kano kano ka khubor ba la don kiba ïap ne mynsaw.
Ka jingkulmar hapdeng ka India bad ka Pakistan, ka la nangjur shuh shuh, hadien ka jing thombor jong ki lehnoh, ha Pahalgam, ha ka 22 tarik, Ïaïong, kaba la shim ïa ka jingim jong ki 26 tylli ki mynsiem briew. Kum ka jingpynrem, ki bor pahara ki la pynjur ïa ka jingpyntreikam ban lap ïa kiba donkti ha katei ka kam thombor.
Ka India ka la shim ïa ki sienjam kiba tyngeh pyrshah ïa ka Pakistan, kynthup ïa ka jingbeh noh ïa ki shipai Pakistan kiba la shah pyntreikam, ka jingpynsangeh ïa ka jingïateh soskular jong ka Indus Waters Treaty kaba la rim palat hynriew phew snem, bad ka jingkhang mardor ïa ka jaka ïaid lynti jong ka Attari.
Ïa kine ki rai la shim ha ka sngi Balang jong ka taïew ba la lah hadien ka jingïalang jong ka Cabinet Committee on Security ba la pynïaid da u Myntri Rangbahduh ka ri u Narendra Modi, uba la kular ba ka India kan “ithuh, bud dien, bad pynshitom” ïa uwei pa uwei u lehnoh bad ki “nongkyrshan” jong ki kiba donkti sha lyndet jong ka jingthombor kaba la shim ïa ka jingim briew ha Pahalgam.
Kum ka jingpynshitom beiñ, ka Pakistan ka la pynsangeh noh ïa baroh ki jingïateh ba arliang mamla bad ka India, kynthup ïa ka Simla Agreement jong u snem 1972.
Ki shipai India ki la pynstet ha ka ban pynphai kylla ïa ka jingsiat, ym shym la don kano kano ka khubor ban tip ba mynsaw ne ïap briew.
Ha kajuh ka por, ki pulit ki la pyllait ïa ki dur jong ki lai ngut ki briew kiba la shah suba ba ki donkti ha katei ka kam thombor ha Pahalgam. Kine kiba la shah suba ki dei kiba la tip kyrteng kum u Hashim Musa ba la tip ruh da ka kyrteng kum u Suleman bad u Ali Bhai ba la tip ruh kum u Talha Bhai kiba dei na Pakistan bad u Adil Hussain Thoker uba dei u nongshong shnong jong ka Anantnag distrik.
La pynbna ban ai khusnam T.20 lak halor ka jinglah ban ai jingtip kiba lah ban ngeit kiba lah ban ïarap ha ka ban ïohkem ïa kine ki runar.
Nalor kata, ha South Kashmir, ki bor pahara ki la pynpra ïa ki ïing jong ki lai ngut kiwei pat kiba la suba ba ki dei ki lehnoh bad baroh ki ïing kiba la shah pynpra ki la poi sha ka khyndai tylli naduh ba la jia ka jingshah thombor ha Pahalgam.
Ki jaka ki dei jong u Adnan Shafi Dar (Shopian), u Amir Nazir (Pulwama), bad u Jameel Ahmad (Bandipora).
Halor kane ka jingleh jong ka India, ka Pakistan ka la pynsangeh noh ïa ka Shimla Agreement jong ka snem 1972 bad khang ïa ki jaka kit liengsuiñ jong ka ïa ki liengsuiñ jong ka India.
U Myntri Rangbah ka Jammu bad Kashmir, u Omar Abdullah, haba kyrshan ïa ka jingïakhun kaba tyngeh pyrshah ïa ki kam lehnoh, u la maham pyrshah ïa ki kam kiba lah ban pynjngai ïa ki briew kiba lui lui ha kane ka thaiñ.
“Ki paidbah jong ka Kashmir ki la pynrem pyrshah ïa ki kam lehnoh bad ka jingpynïap ïa ki riew paidbah kiba lui-lui. Ka la dei ka por ban tei ïa kane ka jingkyrshan hynrei ban kiar na kino kino ki kam bakla kiba lah ban pynmynsaw ïa ki jingim ba lui lui. Pynshitom ïa kiba donkti, hynrei pynthikna ba ki briew kiba lui lui kin ym shah kem ha ka jingshah siat kaba markylliang,” ong u Abdullah ha ka rynsan X.
