Bertina Lyngdoh
La bynta i’u briew ha ka jingibit jong u, kata la ha ka jingstad, ka jingshemphang, ka jingtbit, ka jinglah, bad kumta terter. Ka jingnang jingtip, jingstad jingshemphang, ka jingtbit, nyngkong eh ka sdang na la ïing la sem, nangta pat sa na ki jaka pule. Ka jingstad kam da dei eh namar ka jinghiar pateng na ki kmie ki kpa, ne ki bahaïing bahasem, hynrei ka dei ruh ka jingstad kaba la bynta kyrpang ha U ne Ka. Kiba wan shakhmat ha ki jingpule jong ki, ym da dei eh ba ki stad, hynrei ka dei namar ka jingminot bad jingtrei shitom jong ki. Baroh u briew ba stad, hynrei ban nang kham tbit bad roi ha ka jingnang jingtip, lym ruh ban nang kham janai, donkam ban minot nalade bad trei shitom da la ka mon. Ka jingjop kam dei da ka jingstad ba shu pynbor lane ka ban sa tang ban nguid ïa kaba la dep ban tylliat da kiwei.
Kumta, lada ngi la kup ïalade da ka jingstad tynrai, dei ban minot da la ka bor sngewthuh khamtam haba ïa dei bad ki jingthoh ha ki kot ki sla. Ka jingpass bha ïa ki eksamin kam lah ban long namar ba don ki lad ka jingpynsuk nuksa, ki guide book lane ki kot kiba la don lypa ïa ki jingkylli bad jubab hynrei ka dei pat ban long da ka bor sngewthuh ne ka jinglah ban sngewthuh ïa ka jingmut ha ki jingthoh ha ki kot. Ki guide book ha ka jingshisha, ki dei tang kum kita kiba ai ksai ne ai dak ïa ki khynnah ba kin pynkhreh ïalade ban pynpaw ha ki jingthoh ha ka por eksamin ïa ka jinglah jong ki ban sngewthuh ïa ka jingmut ne kaei kaba ka lynnong ka don ban kren ha ki. Ban shu bam lyndet khlem ka jingsngewthuh kam dei ka jingstad. Ban shu heh ha ka kyrdan pule khlem da don ka mynsiem ïakhun kata ruh kam dei ka jingstad. Lada dei hi kiba minot bad kwah ban ïahun ïa ka jingstad da la ka mon, kim dei ban shaniah ha ki guide Book. Kumjuh ruh haba kwah ban pyndonkam ïa ka jingstad tynrai, kampher la jngai, pajih, la jan ka lynti ïaid, hynrei dei ban buh ka thong, ban ïoh ïa ki kot text book ban pynlut por ban pule bad sngewthuh ïa ki jingthoh ha ki kot. Ban roi ha ka jingnang jingtip, ne ban ïar bad proh ha ka jingmut jingpyrkhat, dei ban long kiba wad bniah kiba tih bniah ïa ki kot pule kiba kum ka poitri, ki jingïathuhkhana, ki drama, ki nobel, bad ki lynnong kiba don ha ka kot.
Te namarkata, pyndonkam ïa ka jingstad na tyllong, wat la kan pher ha ka jinglah na uwei sha uwei pat. Kum ki kmie ki kpa, ngim dei ban pynshlur ïa ki khun ba kin shaniah ha ki Guide Book. Ka jingshaniah than ha ki guide Book ka pynlong ïa U ne Ka, ban ym don shuh ka mynsiem ïakhun kaba da la ka mon. Kiar na ka ban pule lyndet hynrei ïaleh ban thoh ïa ki jubab da la ka jingsngewthuh ba ki briew te kin ïoh ïa ka jingstad tynrai ba shisha jong phi. Ka jingnang jingtip kam dei ban roi tang na ki kot skul hynrei khamtam ruh kiba na shabar ki kot skul.
