Kino kino ki jingpang jingshitom kiba pynjynjar ïa ka jingim jongngi ki briew. Namar ki bym lah ban pynduh jait bad ki bym lah ban pynkoit pynjem, wat lada ngi dih dawai bad phah sumar katno katno ruh. Ki lah ban jem shipor ar por hynrei kin ïai khie ha ka jingim jongngi ki briew. Namar ka jingpang jingshitom ki ïai wan pynjynjar ïa ka met ka phad jongngi katba ngi dang im hangne ha sla pyrthei.
Ka jingpang jingshitom ka la don naduh hyndai kulong kumah bad ka dang ïai sah haduh kine ki sngi ha ka jingim jongngi ki briew. Ym don u briew uba lait na ka pang ka shitom. U lah ban ym don jingpang jingshitom katba dang khlaiñ dang shait. Hynrei ynda ka met ka la nangti bad ka la nangtymmen ka jingpang jingshitom kan don beit ha u briew shuwa ban un iap bad ïehnoh ïa kane ka sla pyrthei. Hooid ngi don ki Doktor bad ki jaka sumar da ki phew hajar ruh ki lah ban pynkoit bad pynjem tang shi por ar por hynrei kim lah ban pynjem shi rta ka jingim. Kane ka long ka bor jong ka jingpang kaba pyntroiñ ïa ka bor met jongngi ki briew.
C. B. Iawphniaw
