New Delhi, ïaïong:
U President ka Congress uba dei ruh u nongïalam ka liang pyrshah ha Rajya Sabha u Mallikarjun Kharge bad u Rahul Gandhi kum nongïalam ka liang pyrshah ha Lok Sabha ki la buh ka jingkyrpad ïa u Myntri Rangbahduh ka ri u Narendra Modi ban khot ïa ka dorbar kyrpang jong ka Parliament na bynta ban pyni ïa ka jingkut jingmut bad ka mon lang jong ka India ban ïakhun pyrshah ïa ka kam thombor jong ki lehnoh ha Pahalgam.
Ha ka shithi jong u sha u Myntri Rangbahduh ha ka janmiet jong ka Lah Sngi U Blei, u Kharge u la ong, “Ha kum kane ka khyllipmat, haba ka jingïatylli bad ka jingsngewlem ka long kaba donkam bha, ka liang pyrshah ka ngeit ba ka long kaba kongsan ban khot ïa ka dorbar kyrpang jong baroh ar tylli ki ïingdorbar jong ka Parliament kham kloi katba lah.”
“Kane kan long ka jingpyni kaba khlaiñ ïa ka jingkut jingmut bad mon lang jong ngi ban ïaleh pyrshah ïa ka jingshah thombor ba shyrkhei ha Pahalgam ïa ki nongshong shnong kiba lui lui ha ka 22 tarik, Ïaïong, 2025. Ka long ka jingkyrmen kaba skhem jong ngi ba ïa ka dorbar yn khot kumba la kwah,” bynrap biang u Kharge.
Ha ka shithi jong u sha u Modi, u Gandhi u la ong, “Ka jingthombor jong ki lehnoh ha Pahalgam ka la pynbitar ïa baroh ki nong India. Ha kane ka por kaba eh, ka India ka dei ban pyni ba ngin ïai ïeng tylli lang pyrshah ïa ki kam lehnoh. Ka liang pyrshah ka ngeit ba dei ban khot ïa ka dorbar kyrpang jong baroh ar tylli ki ïing ha Parliament, ha kaba ki nongmihkhmat bad ka jingkut jingmut jong ki briew ki lah ban pyni ïa ka jinglong ba kyrpang jong ki. La kyrpad ba kum kane ka jingïakren ka dei ban don kham kloi katba lah.”
Ka tnat pynïadei jong ka seng Congress, ka la pyllait paidbah ïa kitei ki ar tylli ki shithi ha ka step jong ka Sngi Ba-ar.
U MP ka Congress bad u nongïalam ka liang pyrshah ha Lok Sabha u Rahul Gandhi ruh u la thoh ïa ka shithi kaba kum kane kaba la thoh sha u Modi ha ka Sngi Ba-ar, da kaba kyrpad ban khot ïa ka dorbar kyrpang “ha ka por kaba kloi tam”.
“Ka jingthombor jong ki lehnoh ha Pahalgam ka la pynbitar ïa uwei pa uwei u nong India. Ha kum kane ka por kaba eh, ka India ka dei ban pyni ba ngin ïai ïeng tylli lang ban pyrshah ïa ki kam lehnoh” u la thoh ha ka shithi.
Ka sorkar haduh mynta, ka la khot ïa ka jingïalang jong baroh ki sengbhalang ha ka 24 tarik, Ïaïong ha kaba u Myntri ka tnat ïada ri u Rajnath Singh, u Myntri ka tnat ki kam poh ïing ka sorkar pdeng u Amit Shah bad ki ophisar na ka Intelligence Bureau (IB) bad ka tnad kam pohïing ki la ïathuh ïa ki heh jong ki seng saiñ pyrthei bapher bapher halor ka jingshah thombor ha Pahalgam.
Ha katei ka jingïalang, u Singh, u la ong ba ka sorkar, ka “kular” ban shim rai “da kaba ai tyngeh” halor ka jingshah pynïap jong ki 26 ngut ki nongjngohkai pyrthei, ha Pahalgam kaba ha J&K. Ki seng ka liang pyrshah ki la buh katto-katne ki jingkylli halor ka jingbym biang jong ka jingïada hynrei ki la pynthikna ban kyrshan ïa ka jingleh jong ka sorkar, kaba pyni ïa ka jingïatylli jong ka ri halor ka jingshah thombor kaba shyrkhei tam ïa ki riew paidbah ha ki phew snem.
Ki shithi jong u Kharge bad u Gandhi sha u Myntri Rangbahduh ki wan hadien katto katne kynta ba u heh ka Congress u la buh jingkylli paidbah ïa ka jingbym don jong u Myntri Rangbahduh ha ka jingïalang jong baroh ki seng saiñ pyrthei. Ha ka jingïalang paidbah ha Rajasthan, u Kharge u la ong, “U Modi, u buh hakhmat eh ïa ka jingïalang ilekshon ha Bihar ban ïa ka ri. La kumno kumno phi la dei ban wan sha ka jingïalang (jong baroh ki seng) haba ngi la tyrwa ïa ka jingkyrshan kaba pura ïa kano kano ka sienjam kaba ka sorkar ka kwah ban leh”.
Ka sorkar kam pat leh eiei halor katei ka jingtyrwa jong ki.
