New Delhi, ïaïong:
Ka kynhun National Investigation Agency (NIA), kaba dang bteng ïa ka jingtohkit halor ka jingthombor jong ki lehnoh ha Pahalgam, ka la ithuh ïa palat 12 ngut ki nongïarap jong ki lehnoh.
Kumba la ïoh jingtip, la ong ba 8 ngut na kine ki dei na ka Lashkar-e-Taiba (LeT), bad mar 3 ngut ki dei na ka Jaish-e-Mohammad (JeM) bad ka Hizbul Mujahideen (HM).
La suba ba kine ki la ïarap ïa ki lehnoh ban pynlong ïa katei ka kam thombor, la ïathuh ki tyllong khubor ha ka Lah Sngi U Blei.
Ki tyllong khubor, ki ïathuh ba katkum ki jingtip jong ki riew pawkhmat, haduh 60 ngut ki lehnoh, ki don ha ka them jong ka Kashmir.
Hynrei ka kynhun NIA kam pat lah ban tip ïa ki jaka ba kine kiba la shah suba ki don, bad mynta ki don hapoh ka jingpeit bniah jong ka kynhun katba ka jingtoh-kit halor ka kam lehnoh ha Pahalgam ka dang ïaid shakhmat.
Ka kynhun NIA ka la ithuh ïa ki napdeng ka thup ba la ïasam da ka kynhun Intelligence Bureau hadien ba la buh jingthoh ïa ki jingkren jong ki briew kiba la lait im na katei ka jingshah thombor, kaba la shim ïa 26 ngut ki mynsiem briew bad kaba la pynmynsaw ïa ki katto katne ngut, kiba wan na ki jylla bapher bapher.
Napdeng ki 14 ngut ki lehnoh kiba treikam kiba don ha ka thup jong ki nongsuba jong ka NIA, kiba bun ki dei kiba la don ha ka rta kaba 20 snem shaneng bad ki la leit ban pynïasoh bad ki seng lehnoh kiba don ha Pakistan hadien u snem 2022.
Kitei ki lehnoh kiba trei kam ha ki distrik bapher bapher, ha kaba 5 ngut ha Shopian, 4 ngut ha Pulwama, 2 ngut ha Anantnag, bad mar uwei ha Sopore, Awantipora bad Kulgam.
Katkum ki tyllong khubor ba la ïohlum, la suba ba u Ahsan Sheikh jong ka LeT, u dei uba donkti ha katei ka kam thombor ha Pahalgam, ha ryngkat ki saw ngut kiwei pat ki briew.
Ka ïing jong u ka la dep ban shah pynpra ha ki bor pahara.
Ka ïing jong uwei pat uba shah suba, u Shahid Kutay, uba don ruh ka jingïadei bad ka LeT ruh ka la shah pynpra. Ki bor pahara hajan ka jaka ba jia ka jingthombor jong ki lehnoh ha Pahalgam, ha Anantnag distrik, Jammu & Kashmir.
Uwei pat u lehnoh JeM ba la tip kum u Asif Sheikh u la paw kyrteng kum u nongthombor ha Pahalgam bad kane ka mut ba ka lah ban long ba ka JeM ka la ïarap ïa ka LeT ha ki jingpynïap briew katkum ka jingbthah jong ka tnad wad bniah jong ka Pakistan ka ISI, la ïathuh ki tyllong khubor.
Ka ïingsah jong u Sheikh ha Tral ruh ka la shah pynpra ha ki bor pahara ha ka sngi Thohdieng.
Lah ban kdew ba ki Pulit ka Jammu & Kashmir ki la dep pynmih ïa ki dur jong ki lai ngut ki lehnoh ba kynthup ïa arngut ki nong Pakistan – u Ali Bhai ba la sin Talha Bhai bad u Hashim Musa ba la sin u Suleiman bad u nongtrei ka thaiñ u Adil Hussain Thoker bad pynbna ruh da ka buskit kaba mar T. 20 lak ha ki khlieh jong ki.
