Kolkata, ïaïong:
Ki la don kumba 14 ngut ki briew kiba kynthup ïa ar ngut ki khynnah kiba la ïap na ka jingpluh jong kawei ka ïingbasa hynriew mala kaba don ha ka jaka pdeng jong ka Kolkata, ha ka miet jong ka sngi Ba-ar.
Kiba la ïap ki kynthup ïa 11 ngut ki shynrang, kawei ka longkmie bad ar ngut ki khynnah rit.
Ki heh jong ka tnad pynlip ding ki la ïathuh ba kiba bun na kitei kiba khlad ka dei namar ka jingbym lah ring mynsiem bad ïa pang namar ka jing-rben ka tdem kaba la lyng-uh ha Hotel Rituraj kaba don ha Mechua Bazar.
Kane ka jingpluh ka la ktah khamtam ïa ki nongkhaïi kiba na kiwei pat ki jylla.
“Ki la don 14 ngut ki briew ki la ïap. Ngi la ithuh ïa ki 8 ngut na ki. Kiwei pat ki 13 ngut ki la mynsaw. Baroh la pynkit noh mar mar sha ki jaka sumar kiba don hajan. Katba 12 ngut ki la mih na ki hospital, uwei pat u dang shah sumar ha katei ka jaka sumar”, la ong uwei u IPS ophisar jong ki pulit ka Kolkata. Uwei na ki nongtrei jong ka ïingbasa ba la tip kyrteng kum u Manoj Paswas, u la ïap hadien ba u la kynthih na kawei na ki mala.
“Katto katne ngut ki basah bad ki nongtrei jong ka ïingbasa ki la kiew sha ki mawkyndon bad leit shalor tnum bad ka mala kaba halor duh haba ka tdem ka la lynguh ha ka kamra bad ki jaka ïaid. Uwei napdeng kine u la sheptieng eh bad u la kynthih najrong shapoh,” la ïathuh uwei na ki heh jong ki pulit pyllip ding.
Katkum ka jingïathuh ki heh ka tnad pynlip ding, la ïathuh ba katei ka ding ka la jia ha ka por kumba 8:20 baje eiei mynmiet ha ka mala ba nyngkong jong kawei ka Hotel kaba hynriew mala kaba don ha Madan Mohan Burman Street.
La pynpoi ym duna ïa ka shiphew tylli ki kali pynlip ding. La lah ban tehlakam ïa ka jingpluh jong ka ding ha ka por kumba 3:30 jong ka step sngi Balang.
U Firhad Hakim, u Mayor jong ka Kolkata bad u Manoj Verma, u Police Commissioner jong ka Kolkata, ki la leit sha katei ka jaka ha ka por miet ryngkat ki heh pulit bad ki ophisar pynlip ding.
“Ki pulit bad ki pulit pynlip ding kin tohkit ban lap kumno kane ka jingjia ka la jia. Yn sa buh jingmudui da ka ejahar. La pyntip ïa ka Myntri Rangbah ka Mamata Banerjee halor kane ka jingjia (kaba don mynta ha Digha). La ïoh ban pyllait im ïa ki katto katne ki trai hotel”, la ong u Hakim ha ki nongthoh khubor ha ka step jong ka sngi Balang.
Ki Pulit ki ïathuh ba ki don haduh 88 ngut ki briew kiba sah ha ki 42 tylli ki kamra ha katei ka Hotel.
Ka ïingbasa ka don kumba 60 ngut eiei ki nongtrei.”La thaw ïa ka kynhun tohkit ba kyrpang ban tohkit ïa kane ka jingjia”, la ong u IPS ophisar.
