New Delhi, ïaïong:
Ki la don palat 1,000 ngut ki nong India kiba la mih noh na Pakistan sha la ïing lyngba ka khappud Wagah ha kine ki hynriew sngi ba la dep hadien ba ki la shah pynbor ban pynlyngkot ïa ka jingleit jngoh jong ki namar ka jingpyndam ïa ki visa hadien ka jingshah thombor jong ki lehnoh ha Pahalgam, la ong uwei u heh sorkar ha ka Lah Sngi U Blei.
“Palat 1,000 ngut ki nong India ki la mih na Pakistan sha la ïing lyngba ka khappud Wagah ha kine ki hynriew sngi ba la dep. Kumjuh ruh palat 800 ngut ki nong Pakistan ki la wanphai sha la ïing haduh ka Lah Sngi U Blei” ong uwei u heh sorkar.
U la bynrap ruh ba kito kiba don ïa ki Visa ba jrong por na baroh ar tylli ki ri ki ïakynduh jingeh ha ka jingwanphai biang sha la ka jong ka ri.
Ha ka Sngi U Blei, 236 ngut ki nong Pakistan ki la leit sha la ka jong ka ri bad 115 ngut ki nong India ki la ïaid lyngba sha la ka jong ka ri.
Ha Wagah, ki shipai pahara khappud jong ka Pakistan bad ki shipai pahara khappud jong ka India ki la peit bniah bha ïa ki kot ki sla jong ki nongshong shnong ba la wan phai sha la ka jong ka ri shwa ban ailad ïa ki ban ïaid shakhmat bad ka jingwan buhai shnong. Ha ka 22 tarik, Ïaïong, ki lehnoh ki la siat ha ka Pahalgam jong ka Kashmir bad pynïap ïa 26 ngut ki briew, ha ka jingshah thombor kaba shyrkhei tam ha ka them Pulwa naduh ka jingshah thombor ha u snem 2019.
Ka Resistance Front (TRF) kaba dei ka kynhun ba mihkhmat na ka bynta ka Lashkar-e-Taiba (LeT) kaba la shah ñiew beaiñ ha Pakistan, ka la kam halor katei ka jingthombor.
Ha New Delhi, ka Cabinet Committee on Security (CCS) ha ka sngi Balang, ka la rai, nalor kiwei pat ki kam, ban khang noh ïa ka Integrated Check Post ha Attari da kaba treikam mardor.
Ka khappud Attari-Wagah ka don hajan ka Amritsar ha India bad ka Lahore ha Pakistan.
Ka New Delhi ka la weng noh ïa ka jingai visa jong ka SAARC ïa ki trai ri kiba wan jngoh ïa ki riewlum jong ki, ka sienjam kaba la bud shen da ka Islamabad.
Ki nong Pakistan kin ym shah ban leit sha India katkum ka skhim pyllait visa jong ka SAARC (SVES) bad kino kino ki visa kiba kum kine kiba la ai ha ki por ba la dep sha ki nong Pakistan la kheiñ ba la pyndam noh.
Ka tnad kam bar ri ka la ong ba baroh ki visa kiba la don lypa kiba la ai da ka India sha ki nong Pakistan ki la shah weng noh naduh ka 27 tarik, Ïaïong bad bynrap ba ki visa sumar ba la ai sha ki nong Pakistan ki la treikam tang haduh ka 29 tarik, Ïaïong.
Da kaba pynïahap ïa ki sienjam jong ka India, ka Islamabad ha ka sngi Palei ka la khang ïa u pud u sam jong ka Wagah, ka la weng noh ïa ki visa ba la ai sha ki nong India hapoh ka SAARC Visa Exemption Scheme (SVES) bad ka la kyrpad ïa ki nongai jingmut jong ki shipai ha Indian High Commission ban mih noh.
“Baroh ki jingleit jingwan sha shiliang pud na India lyngba kane ka lynti yn pynsangeh noh, khlem da lait, kito kiba la ïaid lyngba ki Valid Endorsement ki lah ban wanphai biang mardor lyngba katei ka lynti tangba ym palat ïa ka 30 tarik, Ïaïong”, la ong ka Pakistan.
