Em, kiba long niam bad kiba smat jingïaseng ruh ki donkam ka jingkylla kaba mut ha khmat u Blei. Bad ym tang ki bym long niam ne kita ki riew pyrthei ki bym ju leit jingïaseng. Baroh ngi ki briew ngi dei ban kylla kaba mut na ka pop sha ka hok. Balei kiba long niam bad kiba smat leit jingïaseng ki donkam ban kylla kaba mut ? Namar kum ki briew kiba smat makna ha ki jingïaseng hynrei ki dang leh bun ki kam sniew ba lai phew jait ha ka jingim jong ki.
Ki leh ban long kiba dap ka bishni ka pihuiñ para briew kiba ïeng sakhi lamler bad kiba thok ba shukor kiba tuh kiba klim kiba pynïap kiba arsap bad bun kiwei kiwei kiba ki leh ha ka jingim jong ki kaba man la ka sngi. Kumta ki dei keiñ ban hap kylla kaba mut bad phai sha u Blei. Kam dei tang ka jingleh riew blei ka pyllait bad ym donkam shuh ban kylla kaba mut.
Baroh ngi hap ban kylla kaba mut bad phai sha u Blei lym kumta ka jinglong niam bad ka jingsmat jingïaseng kam dondor ei ei ha khmat u Blei. Haba uno uno uno u don ka mynsiem u Blei ka jingieit para briew ka dap ka shlei. Hynrei ha bym don ka mynsiem u Blei uta u briew u dap da ka jingbishni bad pihuiñ parabriew. Kane ka dei ka rukom im jongngi ki briew hangne ha sla pyrthei. Kiba long niam bad ki bym long niam ruh kim don ka jingïapher ha khmat u Blei. Hynrei ki dei ban don ka dohnud kaba khuid bad u Blei u pdiang ia uba kum uta u briew. Haba ka dohnud kam long kaba khuid ka jinglong niam bad kaba smat jingiaseng kam don dor eiei hakhmat u Blei. Ka ktien u Blei ruh ka ong, suk kiba khuid ha ka dohnud naba kin ioh ïa u Blei. Ka jinglong niam kam lah ban pyllait im ïa u briew na ka pop.
C. B. Iawphniaw
