New Delhi, ïaïong:
Ka la don ka jingpynbna kynsan jong ka Indigo ha kaba la ong ban sangeh noh ïa ka jingpyntreikam ïa ki liengsuiñ sha Almaty na Kazakhstan, kaba sdang naduh ka 27 tarik, Ïaïong, ha kaba la pynkylla ïa ka jingleit shuti jong spah ngut ki nong India sha ka jingsngewduhnong kaba khraw. Kane ka rai ka long hadien ba ka Pakistan ka la khang ïa ki jaka her liengsuiñ jong ka na ka bynta ki liengsuiñ jong ka ri India.
Ki jingthmu shang kai bad leit kai pyngngad jong kiba bun ha Almaty ki la shah ktah shibun hadien ba la bna khubor ba ki liengsuiñ ba la pyntreikam tang ki jong ki nong India ki la shah pynsangeh noh.
Kawei ka longïing kaba don saw ngut, kynthup ar ngut ki riewtymmen, ki la poi sha India ha ka sngi Balang ha ryngkat ka jingeh kaba khraw naba la hap ban phiah noh ar kynhun napdeng jong ki na Almaty.
Ka Anita Krishnan (ha kaba la pynkylla kyrteng katkum ka jingkyrpad) bad u kurim jong ka, ki la hap ban siew palat T.75,000 da ka Air Asthana ban poi sha Mumbai ha ka jaka jong ka bai leit jingleit kaba jan T.18,000 kaba ki la siew ha ka liengsuiñ Indigo.
U hynmen jong ka, u S Karthick bad ka kurim jong u, ki la poi sha Bengaluru da kaba siew T.75,708 da ka Air Arabia lyngba ka Sharjah, kaba long ka jingkiew kaba khraw na ka dor bai tiket Indigo jong ki, kaba T.33,205. La ong ka Anita. “Da ki spah ngut ki nong India ki la shah ktah jur bha. Bun ki longïing nong India kiba don ki tymmen ki la don ha ka nongbah. Ki la don bun jur ruh kiba dang shu dep ïathoh.”
Ki la don shibun ki Phone Call sha ka jaka treikam jong ka Indigo bad sha ka jaka treikam jong ka nongïarap jong ka Nodal Office, ka la ïathuh. “Dei tang hadien ba nga la phah mail sha ka tnad treikam jong ka India ha Kazhakstan bad sha ka tnad treikam pynïaid liengsuiñ ban pan jingïarap ba ka kompeni liengsuiñ ka la sdang ban jubab kham shai bad kham bha.”
U nongaiktien jong ka Indigo u la ong, “Ïa ka bai tiket jong baroh ki nong-leit nongwan kiba shah ktah la pynphai biang pura.”
