Bhubaneswar, Jymmang:
Haba phai khmat sha ka kam kaba kham pher bha ban leh pyrshah ïa ki nongshong shnong jong ka Pakistan ki bym kwah ban mih na India hadien ka jingshah thombor ha Pahalgam, ka sorkar Odisha ka wad ïa ki jingbthah na ka tnad ki kam pohïing, la ïathuh ki tyllong khubor ba hakhliehduh jong ka sorkar ha ka lah sngi U Blei.
Ki la don kumba ar tylli ki jingjia ba ki bor jong ka aiñ ki la lap ïalade ba ki don ha ka jingshah khanglad.
Ka Razia Sultana na Balasore, ka la kyntait ban kohnguh ïa ka hukum ban beh noh ïa ka, ka la kam ba la kha ïa ka ha India hynrei hadien ki kmie ki kpa jong ka, ki la leit sah noh sha Pakistan.
La ïathuh ba ka la poi biang sha katei ka ri ryngkat bad ki lai ngut ki para bad ki kmie ki kpa jong ka ha u snem 1980.
Hadien shisnem, ka la leit jngoh ïa ka Odisha bad ka la ïapoi kha bad uwei u trai shnong Soro. Watla ki bahaïing jong ka ki la wan phai sha Pakistan ha u snem 1984, hynrei ka Sultana ka la sah biang ha Odisha ryngkat bad u kurim jong ka.
Kaba la pynlong ïa kane ka kam ban kham jynjar ka long ba ym don jingthoh ei ei shaphang ka jait visa kaba ka la bat ha ka por ba ka poi ha India ha u snem 1980.
Kam shym la pan visa shuh ne pyrshang ban ïoh ïa ki sakhi jong ka jinglong nongshong shnong jong ka ri India.
“Hashwa ka Sultana ka lah ban pyndep ïa ki kyndon jong ka jinglong nongshong shnong da kaba pynlong nongshong shnong bad pynrung kyrteng hynrei une u rangbah uba la 60 snem ka rta um shym la pan visa ne jinglong nongshong shnong bad kumta u dang sah be-aiñ ha ka ri,” ong ki tyllong khubor. Ka Sultana bad u kurim jong ka ki don arngut ki khun shynrang bad arngut ki khun kynthei.
“Hadien ba ka Sultana kam shym la kohnguh ïa ka jingthoh ba la hukum ba kan mih na India, ngi la kyrpad ïa ki bor ba dei peit ba kin bthah ïa ngi ha kaba ïadei bad ka lynti kaba hadien ban leh pyrshah ïa ka,” ong u SP ka Balasore, u Raj Prasad.
Katba ka Sultana kam don kano kano ka kot kaba biang, kawei ka longkmie Hindu na Pakistan kaba la tip kyrteng kum ka Sharda Bai na Balangir ka la pan ïa ka Long Term Visa (LTV) kaba mut ban pynjlan por kumba saw haduh san bnai mynshwa.
Ka la aplai wat ban long nong India ha u snem 2016. Hynrei baroh ar tylli ki jingaplai jong ka ki dang sahkut bad ka sorkar pdeng, la ïathuh ki tyllong khubor.
“Ngi la kyrpad ïa ki bor ba dei peit ha ka sorkar jylla ba kin ai jingbthah kyrpang ïa ngi ha kaba ïadei bad ka lynti treikam jong ngi shakhmat ha kaba ïadei bad ka jingkyntait ka Sharda Bai ban mih na ka ri,” ong u SP ka Balangir, ka Abilash G. Sharda kaba don ha ka rta kaba ha ki 50 snem, ka la don uwei u khun shynrang bad kawei ka khun kynthei.
U kurim jong ka u la khlad noh ha ki khyndiat snem ba la leit.
Katkum ka Immigration and Foreigners Act, 2025, kino kino ki nong Pakistan, ki bym lah ban mih na India katkum ki por ba la buh da ka sorkar, kin shah kem, kin shah pynngat ha ki kyndon aiñ bad ki lah ban ngat ha ka jingshah set phatok haduh lai snem lane ka kuna kaba heh tam T.3 lak ne baroh ar.
Uwei u heh ophisar jong ki pulit ka jylla u la ong ba ka sorkar ka bud ryntih ïa ki kyndon ba la pynmih da ka tnad ki kam pohïing halor kum kine ki mat.
“Ka MHA ka la ju ai ïa ki jingai jingmut halor ki jingeh sha baroh ki jylla, ngin ïalam lynti da ka MHA”, la ong une u ophisar.
U Director General of Police (DGP) u Yogesh Bahadur Khurania ha ka lah sngi U Blei u la ïathuh ba 12 ngut ki nong Pakistan kiba sah ha Odisha ki la phai ïa ka jingthoh Quit India Notice.
“Ym duna ïa uwei u nong Pakistan u la dep leit noh bad ngi dang peitngor ïa kiwei pat kiba dang don hangne. Ngi dang ap ïa ki jingbthah kiba kham bniah ha kaba ïadei bad ki nong Pakistan kiba la mynjur ïa ka LTV bad kito kiba dang bishar bniah ïa ki aplikeshon jong ki”, u la ong.
Arngut ki longkmie na Pakistan- kawei na Bhubaneswar bad kawei pat, ka longkmie kaba la ïap lok na ka thaiñ Kotpad ha Koraput distrik, ki la leit sha Delhi na Odisha ha ka sngi U Blei, la ïathuh ki tyllong khubor na ki pulit.
Ka nusib jong kiwei, kynthup ïa ka Sultana bad ka Sharda Bai, ka dang sahkut haduh mynta.
