Bengaluru, Jymmang:
U Myntri Rangbah ka Karnataka, u Siddaramaiah, ha ka sngi Thohdieng, u la ïathuh ba u la ïoh ïa ki khubor shah byrngem, bad u la bthah ïa ki pulit, ba kin wad ïa kiba donkti sha lyndet bad ban leh eiei da kaba tyngeh pyrshah ïa ki.
“Nga ruh nga ïoh ïa ki jingshah byrngem, kumno ban leh? Ngi la pyntip sha ki pulit. Ngi la bthah ïa ki pulit ban wad ïa kiba byrngem lyngba ka Phone bad ban leh ei ei pyrshah ïa ki. Hooid, nga ruh nga ïoh (ïa ka jingshah byrngem),” la ong u Siddaramaiah ha ki nongthoh khubor hangne haba jubab ïa ka jingkylli shaphang u Lamphang u U T Khader uba la pynshisha ba u la ïoh ïa ka khubor shah byrngem.
U Myntri Rangbah u la ong ba la bthah ïa ki pulit ban wad kloi ïa ki briew ba donkti ban pynïap ïa u Suhas Shetty ha Mangaluru bad ban kem ïa ki bad ban leh eiei.
Haba pynpaw ba um pat tip ïa ka daw jong ka jingshah pynïap, u Siddaramaiah u la ong, “La ong ba u (Shetty) u dei u nongthoh khubor. Donkam ban peit bniah. Hadien ka jingshah pynïap, nga la ïakren bad ki pulit hynnin ka sngi, bad ngi la phah ïa u ADGP (Law and Order) sha Mangaluru. Kan sa tip ka BJP kaba ju wad ïa kum kine ki jingjia ban leh kam saiñ pyrthei halor jong ka,” u la ong haba jubab ïa ka jingkylli.
Haba buh jingkylli ïa ka BJP halor ka jingshah thombor jong ki lehnoh ha Pahalgam ha kaba 26 ngut ki briew ki la iap, bad haba kylli la u Myntri Rangbahduh ka ri u Narendra Modi u la leit ne em sha katei ka jaka, u Siddaramaiah u kwah ban tip, “Hato kam dei ka jingthut ha ka liang ka jingshngaiñ?”
“La ïathuh ïa nga ba wat tang uwei ruh u pulit ne ki nongpahara um shym la don ha ka jaka ba la jia katei ka jingshah thombor. Lada ym don ki nongpahara, ka mut aïu? Da ki spah ngut ki nongjngohkai pyrthei ki leit shata, hato kim dei ban don ki pulit ha kum kane ka jaka?” u la kylli.
