Em, kam long ka pop ban thok ban shukor tang ïalade ban ioh jingmyntoi ha ka jingim hangne ha sla pyrthei. Lada ka long pop te ym don te ym don wat uwei ruh ban ioh lait im.
Namar naduh ki nongtrei kam balang, ki nonghikai, ki nongkhaïi, ki nongbylla, ki nongrep, ki nongdie jingdie, ki nongsynshar bad bun kiwei kiwei ki long kiba dap tang ka thok ka shukor bad ka bamsap ha man ki kam ki jam hangne ha sla pyrthei.
Ym don uba hok em, ym don wat uwei ruh baroh ki la leh pop bad ki la duh lehnohei ïa ka burom ka jong u Blei (Rom 3 : 23). Baroh ha ngi ki briew ngi don tang ka mynsiem bishni pihuiñ para briew.
Ngi trei eiei ruh ngi kwah ban ioh klun ei bad shim da ka dor ban ioh nong ïalade. Ym ju kham don kiba trei hok ïa kano kano ka kam ruh. Ka jingim jongngi ki briew ka pun ïa ka jingmane bleithaw, ka jing-ai ksuid, ka jingïashun, ka jingïania, ka jingïakhlad, ka jingpihuiñ, ka jingbitar, ka jingïapait, ki jingbishni, ka jingbuaid, ki jingdih kiad kiba kum kine keiñ kin ym ioh ïa ka hima u Blei.
Namar ym don u ba lait na ka thok ka shukor hangne ha pyrthei. Ki riew niam ruh bun kiba bamsap bad kiba sakhi lamler para briew. Ym don uba janai ha pyrthei.
C. B. Iawphniaw
