New Delhi, Jymmang:
Ka ïingbishar jong ka nongbah Delhi, ha ka sngi Thohdieng, ka la pynmih ïa ki jingpynbna ba thikna sha ki nongïalam ka Congress, ka Sonia Gandhi bad u Rahul Gandhi, ha kaba ïadei bad ka mukotduma jong ka National Herald, ha kaba ïadei bad ka jingtohkit jong ka Enforcement Directorate (ED) bad ka jingïakajia ha ka liang ka aiñ, kaba la neh la palat shiphew snem.
U nongbishar ba kyrpang u Vishal Gogne u la kdew ïa ka jingdonkam ban ailad ïa uba shah kynnoh ïa ka hok ban shah bishar.
“Ka hok ban shah bishar ha kano kano ka kyrdan ka pynhiar mynsiem ïa ka jingbishar kaba hok,” la ong u nongbishar u Gogne, da kaba buh ïa ka jingbishar kaba hadien ha ka 8 tarik, Jymmang.
Ka jingtohkit jong ka ED ka la sdang thikna ha u snem 2021 hadien ba ka Magistrate Court ka la shim ïa ka ejahar jong ki riew shimet kaba la mudui ha u bnai Jylliew, 2014 da u nongïalam ka BJP u Subramanian Swamy.
Ka jingujor ka la kynnoh ba ka don ka jingthmu ban leh kam sniew bad ka jingklop ha ka liang ka pisa tyngka kaba donkti bad ki nongïalam khlieh duh jong ka Congress ha kaba ïadei bad ka kot khubor National Herald kaba la jah rngai mynta.
Ki jingkynnoh ki long halor ka jingshimti ïa ka kompeni kmie jong ka kot khubor, ka Associated Journals Limited (AJL), bad hadien kata ka jingseng ïa ka Young Indian, ka seng bym donkam kamai ha kaba baroh ar ngut ka Sonia bad u Rahul Gandhi, la ïathuh ba ki bat 38 percent na ki jingïasam.
Ka ED ka kynnoh ba ïa kane ka jingtei la shna khnang ban pynsuk ïa ka jingshim beit beit ïa ki marpoh khyndew ba kongsan kiba shongdor palat T.2,000 klur-ki jingdon jingem kiba dei trai jong ka AJL.
Ka ED ka kynnoh ba ka Congress ka la ai ram khlem jingpynskhem kaba long kumba 90 klur tyngka sha ka AJL, kaba hadien la aiti sha ka Young Indian ha ka dor kaba 50 lak tyngka.
Kane, ka kynhun, ka kam, ka la ailad ïa ka Young Indian, ba kan ïoh bor halor ka AJL bad ki jaka jong ka, kiba kynthup ïa ki jaka ba kordor ha Delhi, Lucknow bad Mumbai.
Ka ED ka la kynnoh ba ki Gandhi bad kiwei kiwei ki riew pawkhmat jong ka Congress ki la pynkhuid pisa kumba 988 klur tyngka lyngba kane ka jingpynbeit.
Ka Congress ka la kynnoh ïa ka ED bad ka sorkar pdeng ba ki pyndonkam ïa ki tnat tohkit kum ki atiar ban pynshitom beiñ ïa ka saiñ pyrthei.
U President ka Congress u Mallikarjun Kharge u la kren sha ki nongïalam ka seng ha New Delhi dang shen, da kaba ong ba ka seng kan ym shah pyntieng ha kaei kaba u la batai kum ka “mynsiem ban pynshitom beiñ”.
“Phi la dei ban ïohi kumno, kum shi bynta jong ka buit thma kaba khraw, ïa ki kyrteng jong ka Chairperson ka CPP, ka Sonia Gandhi bad ïa u nongïalam ka Liang Pyrshah ha Lok Sabbha, u Rahul Gandhi, la buh ha ka kot kynnoh ha ka mukotduma jong ka National Herald,” ong u Kharge.
Ka Congress ka la pynskhem la slem bah ba ka Young Indian ka dei ka kompeni kaba trei kam ym ban ïoh jingmyntoi.
