Vijayawada, Jymmang:
U Myntri Rangbah barim u YS Jagan Mohan Reddy ha ka sngi Palei u la pdiang sngewbha ïa ka rai jong ka sorkar pdeng ban pynlong ïa ka jingkheiñ jaitbynriew ha baroh kawei ka ri, da kaba pynksan ïa ka bynta ba kongsan jong ka Andhra Pradesh ha kane ka jingthmu.
Ha ka jingthoh ba la phah ha ka rynsan X, u Jagan u la kdew ba ka AP ka la shim ïa ka lyngkor da kaba mynjur ïa ka rai na ka bynta ka jingkheiñ jaitbynriew ha u bnai Naiwieng, 2021, bad pynlong ïa ka jingkheiñ jaitbynriew kaba nyngkong eh ha ka ri ha u bnai Kyllalyngkot, 2024 lyngba ki tnad treikam jong ki shnong bad ki Ward.
“Ka jingkheiñ briew katkum ka jaitbynriew kan plie lad ïa ki lad jingïarap ba la thmu, ban pynthikna ïa ka roi ka par bad ka imlang-sahlang jong ki jaitbynriew kiba sahdien bad kiba shah iehnoh beiñ. Kane ka dei ka sienjam kaba kongsan bha ban ïoh ïa ka jingbishar hok ha ka imlang-sahlang kaba shisha, bad ka jingroi kaba kynthup lang ïa baroh,” u la bynrap.
U Jagan u la kynnoh ïa u Myntri Rangbah ka jylla u N Chandrababu Naidu ba u la thaw ïa ka jingthmu ban knieh ïa ka jingsynshar halor ki kynhun paidbah ha kaba ka TDP ka duna ka jingbun paid.
Haba ïakren bad ki nongmihkhmat jong ka YSRCP, u la kynnoh ba ka jingsynshar jong u Naidu ka dei kaba la pynpaw da ka jingleh shiliang khmat bad ka jingpynbor.
U la kdew ïa ki buit jong u Naidu ha Kuppam, ha kaba ka YSRCP ka la jop 16 tylli na ki 25 tylli ki Ward, katba ka TDP pat ka ïoh tang 6 tylli.
“Mynta, ka TDP ka la ïoh ban synshar ïa ka sor lyngba ka jingpyntieng pynsmiej, kaba la buh nuksa ïa ka jingleh kaba kum kane shawei pat,” u la kynnoh.
