New Delhi, Jymmang:
Ki la don kumba 21 ngut ki nong Pakistan kiba sahkut ha khappud Attari-Wagah hadien ba la kut ka por ba la buh da ka sorkar India ban mih noh na kane ka ri, ki la ïaid lyngba sha Pakistan lyngba ka lynti khyndew jong ka Integrated Check Post ha ka sngi Thohdieng, ong ki heh sorkar.
Hadien ka jingthombor jong ki lehnoh ha Pahalgam ha ka taïew ba la dep, ka sorkar India ka la weng noh ïa baroh ki jait Visa ba la ai sha ki nong Pakistan bad bthah ba kin mih noh hapoh ka 30 tarik, Ïaïong.
Ka khappud Attari-Wagah, kaba don marjan bad ka Amritsar ha India bad Lahore ha Pakistan, ka la shah khang khyrdep ha ka sngi Palei, hadien ba la plie haduh ka 30 tarik, Ïaïong.
Katkum ki khubor ba la ïohlum, la ong ba ki la don kumba 70 ngut ki nong Pakistan kiba la sahkut ha khappud ha ka sngi Palei hadien ba ka por ba la buh ïa ki ban mih na India ka la kut noh shisngi shwa.
Ki 21 ngut ki nong Pakistan kiba la rung sha Pakistan haduh ka por 12 baje janmiet jong ka sngi Thohdieng ki la shong ktem ha ki surok shabar jong ka Integrated Check Post.
Kumba 50 ngut shuh shuh ki nong Pakistan ki dang ïeng laiñ shabar jong ka Integrated Check Post bad ki lah ban shah ban jam sha Pakistan hadien ba la dep ban pyndep ïa ka jingpynbna kaba biang na ki bor pynïaid khaïi bad ki heh ba dei khmih halor ki poiwir.
Ka Pakistan ha ka sngi Thohdieng ka la pynbna ba kan bteng ban ailad ban pyndonkam ïa ka jingker khappud Wagah na ka bynta ki nongshong shnong jong ka kiba sahkut ha India.
Haba jubab ïa ki jingkylli jong ki lad pathai khubor, u nongaiktien jong ka tnad kam bar ri jong ka Pakistan u la kam ïa ki khubor ba ki nong Pakistan, kynthup ïa ki khynnah rit, ki sahkut ha khappud Attari ha ka liang ka India.
“Ngi tip ïa ki khubor na ki lad pathai khubor kiba pyni ba ki don ki nong Pakistan kiba sahkut ha Attari. Ngi plie lad ban pdiang ïa ki nongshong shnong jong ngi lada jia ba ki bor synshar India ki ailad ïa ki ban ïaid lyngba ïa u pud u sam na ka liang jong ki,” la ong u nongaiktien.
Ka khappud Wagah kan dang plie na ka bynta ki nong Pakistan kiba kwah ban wanphai biang ha ki por ban wan ruh, la bynrap shuh shuh u nong-aiktien.
Hynrei, katto katne kiwei pat ki nongwei kiba don ïa ka Visa ban ïaid da ki kali shimet jong ki kim pat shah ban ïaid lait ïa ka khappud bad ki dang ap hajan ka Integrated Check Post.
