Chennai, Jymmang:
Ha ka khubor kaba shai sha ki nongbud jong ka seng shwa ka ilekshon sha ka ïingdorbar thawain ha u snem ban wan, u President ka DMK bad u Myntri Rangbah ka jylla u M K Stalin u la ong ba ïa ki kyrtong na ka bynta ka ilekshon yn rai da ka bor synshar jong ka seng bad ba ka dei ka kamram jong ki Secretary jong ka distrik ban pynthikna ïa ka jingjop jong ki, wat la ka seng ka la pynrem ïa ka sorkar pdeng na ka bynta ka BJP. “ka politik pynrem” bad u la kular ban ïakynduh ïa ka da ka aiñ, lait noh tang ban rah ïa ka mat sha ka ïingbishar jong ki paidbah.
Ha ka jingïalang jong ki District Secretary jong ka seng hangne ha kine ki khyndiat sngi ba la leit, u Stalin u la bthah ïa ki Myntri ba kin pynlut kham bun ka por ha ki distrik jong ki ha ka jaka ban sah ha Chennai bad u la bthah ïa ki MLA ba kin leit jngoh ïa man la ki Ward bad shnong ha la ki jong ki jong ki konstitwensi.
U Stalin u la ïathuh ha ki nongïashim bynta ba ka bor kaba khraw tam jong ka seng ka shong ha ka rukom synshar kaba la pynskhem bha, kaba ïaid shaduh ki kyrdan ba shapoh. U la ban jur ïa ka jingdonkam ban pynim biang ïa kane ka rukom treikam jong ka seng katba nang mih ki sngi.
Utei u nongïalam ka DMK u la kynnoh ba ka sorkar pdeng ka la pyndonkam bakla ïa ki tnad treikam jong ka ban pyntieng ïa ki seng kum ka AIADMK ba kin ïasoi ban ïatreilang bad ka BJP. “Ka BJP ka dang pyrshang ban pynskhem ïa ka jingdon jong ka ha Tamil Nadu. Ban pynurlong ïa kane, ka la ïoh bor halor ka AIADMK lyngba ki buit pynbor. Ha ka jingshisha, u Edappadi K Palaniswami u sheptieng ba ka jinglong nongïalam jong u kan kylla long ka bym lah ban bat lada u kyntait ïa ka jingïateh lok bad ka seng BJP” ong u Stalin.
Ka jingïalang ka la pdiang ruh ïa saw tylli ki rai, kynthup ïa kawei kaba pynrem ïa ka sorkar pdeng kaba thaw ïa ka “Undeclared Emergency”.
Ka rai ka ong, “Kane ka jingïalang ka pynrem ïa ka sorkar pdeng kaba la tuklar ïa ki tnad treikam ba synshar hi, kynthup ïa ka tnad bishar, da kaba pynthut ïa ka jingtreikam laitluid jong ki.”
Ka la ong ba ki tnad ED, CBI, bad IT, ki tnad kiba la khmih lynti ba kin treikam khlem da shim liang, mynta ki shah “pyndonkam bakla ha ka sorkar pdeng pyrshah ïa ki seng ka liang pyrshah kiba wanrah jingkulmar ha ka kam saiñ pyrthei”. Kane ka “jingpyndonkam bakla” ka la pynmih ïa ka jingkynthoh na ka ïingbishar bahakhliehduh bad ka ïingbishar baha-khliehduh.
Ka jingïalang ka la rai ruh ban ïakhun pyrshah ïa ka sorkar ba la ïalam da ka BJP “ka jingpyndonkam bakla ïa ki tnad tohkit jong ka sorkar pdeng pyrshah ïa ki nongbud jong ka DMK na ka bynta ki kam kiba don jingthmu ha ka saiñ pyrthei” lyngba ki lad kiba dei katkum ka aiñ bad ban poi sha ki paidbah halor ka “jingpyndonkam bakla ïa ka bor” da ka pdeng bad ka la kular ban ïakhun pyrshah ïa ka seng BJP bad ki seng ba la ïatreilang jong ka ha ki jingïakynad.
Ki nongïalam ka DMK, ba kynthup ïa u K Ponmudy bad u V Senthil Balaji, ki don hapoh ka jingpeit jong ka kynhun ED, ha kaba ïadei bad ki jingjia ba kyrpang.
U Stalin u la ong ba ka DMK ka la mad ïa ki katto katne ki jingtynjuh ha ka jingïaid lynti kaba jngai jong ka bad kito ki bym lah ban jop ïa ka seng ha ka saiñ hima sima kin pyrshang da ki buit pyntieng pynsmiej. “Kumta, to ngin ïakhun pyrshah ha ka saiñ hima sima ïa ki jingbyrngem jong ka BJP,” u la ong.
Ka la rai ruh ban pynlong ïa ki jingïalang paidbah ha ki 1,244 tylli ki jaka ha kylleng ka jylla ban pynpaw ïa ki jingjop jong ka jingsynshar jong ka DMK kaba saw snem.
Kumjuh, la pynbna ba ka jingïalang jong ka seng kan long ha Madurai ha ka 1 tarik, Jylliew. Ka jingïalang ka la mynjur ruh ïa ka rai kaba sngewlem ïa ka jingïap jong ki riew paidbah kiba shida ha Pahalgam (J&K) bad kumjuh ïa ka jingkhlad noh dang shen jong u Pope Francis.
