Lucknow, Jymmang:
Ki bor ba dei khmih ki la beh noh ïa ki nong Pakistan kiba don ïa ki Visa ba lyngkot por katba ki dang pynkhlaiñ peitngor ïa kito kiba sah ha katei ka ri da ki Visa bajrong por hadien ka jingthombor jong ki lehnoh ha Pahalgam ha u bnai ba la lah.
Ha kajuh ka por, ym duna ïa ki 22 ngut ki kynthei Pakistan la ithuh ha Moradabad kaba don ha Uttar Pradesh kiba la im da ki Visa ba slem bad kha ïa ki 95 ngut ki khun ha India. Baroh ki kynthei ki dang ïai bteng ban bat ïa ka jinglong nongshong shnong jong ka Pakistan, katba ki khun jong ki, ki la ïoh ïa ka jinglong nongshong shnong jong ka India.
Katkum ka jingtohkit jong ki pulit, kine baroh ki la shong la sah ha katei ka distrik la bun bun snem, ha kaba bun na ki khun jong ki mynta ki la heh la san bad ki la shong kurim. Haduh 35% na ki kynthei mynta ki dei ki kmie tymmen. Da ki khun ki kti bad ki khun ki kti jong ki, kine ki longïing ki la nangroi haduh palat 500 ngut ki dkhot.
La ïathuh ba arngut na kitei ki kynthei, ki la poi sha India saw snem mynshwa, katba kiwei pat, ki la sah ha katei ka distrik, da ki phew snem. Ki pulit ki dang buddien ruh ïa ka kam ba ki trei mynta jong kitei ki 95 ngut ki khynnah ba la kha ha India bad ki dang wad bniah ruh ïa ka jingïadei bad kiba haïing hasem ha Pakistan.
Kine ki kynthei ki don ïa ka Card khaw rashon bad ka Aadhaar Card ba la ai da ka sorkar India, kaba ailad ïa ki ban ïoh ïa ki jingmyntoi paidbah, hynrei ym don uwei ruh na ki uba la ïoh ïa ka jinglong nongshong shnong jong ka ri India haduh mynta. Baroh kine ki la pan ïa ka jinglong nongshong shnong, ong ka khubor na ki pulit. Ki longïing mynta ki dei ki nongshong shnong jong ka ri India kiba la kha na ki kmie kiba na Pakistan kiba dang sah kum ki nongwei.
“Ka jinglum jingtip kaba bniah ka dang ïaid shakhmat. La lum jingtip halor baroh ki longïing kiba wan na Pakistan ha katei ka thaiñ, kynthup ïa ka jinglong jingman jong ki jingpan visa jong ki, ka jingpyndonkam ïa ki Card rashon, ka jingheh jong ki longïing bad ki jingïadei shabar ri,” ong u heh pulit ka Moradabad (City) u Kumar Ranvijay Singh.
Ki pulit bad ki kynhun syntiat jong ka thaiñ ki la ïathuh ba ki dang buddien bha ïa kine baroh bad ki dang tohkit ruh ban pynthikna ba kin ym don ki riew beaiñ kiba sah ha Moradabad.
Katba ki nong Pakistan kiba sah ha India da ki Visa ba jrong por ki bym shym la ïoh ïa ka jinglong nong India la bthah ba kin apply biang ïa ki Visa jong ki. Ha ka hukum jong ka, ka tnad kam pohïing ka la pynpaw ba ka por ban apply biang ïa ki LTV ka long naduh ka 10 tarik u Jymmang haduh ka 10 tarik u Naitung. Uno uno u nong Pakistan u bym lah ban apply biang hapoh kane ka por un shah weng noh ïa ka LTV jong u, katkum ka hukum jong ka
Ministry of Home Affairs (MHA).
Ha ki sienjam ba tyngeh pyrshah ïa ka Pakistan, shisngi hadien ka jingthombor jong ki lehnoh ha Pahalgam kaba la pynïap ïa 26 ngut ki briew, ka sorkar India, ka la pynbna ba ïa ki nong Pakistan, yn nym shah ban leit sha India, bad kito kiba don mynta ha katei ka Ri, da ki Visa ba lyngkot por, ki dei ban mih noh hapoh 48 kynta.
Hadien kane ka jingshah thombor jong ki lehnoh, ki tnad pahara ha kylleng ka ri India ki la pynjur ïa ka jingpeitngor bad jingkhmih bniah ïa ki bar jylla, khamtam ïa kito kiba sah ha India da ki visa ba jrong por.
