Srinagar, Jymmang:
Ki shipai Pakistan, sa shisien, ki la pynkheiñ biang ïa ka aiñ sangeh ïasiat ha shi lynter u Line of Control (LoC) ha Jammu & Kashmir, da kaba bteng ïa ki jingthombor ba khlem don daw ha ki bynta bapher bapher. Kane ka dei ka miet kaba khatar ba bud jong kum kine ki jingpynkhihwin, kaba pynjur ïa ka jinglong kaba la don lypa kaba ïabuh sni hapdeng kine ki ar tylli ki ri.
Ka jingshah siat bom kaba khatduh eh da ki shipai Pakistan, kaba la sdang hynnin ka miet, ka la pynlong ïa ki shipai India ban pynphai kylla ïa ka jingsiat khlem da pynslem. Ka jingïasiat kaba markylliang ka la buh ïa ka India bad ka Pakistan ha ki jingbym ïasngewthuh jingmut hadien ba la jia ka jingthombor jong ki lehnoh ha Pahalgam ha ka 22 tarik, Ïaïong ha kaba ka la shim ïa ka jingim jong ki 26 ngut ki briew.
Kine ki jingïasiat ki dang jia ha ki san tylli ki distrik na ki hynñiew tylli ki distrik jong ka khappud jong ka Jammu & Kashmir. Haduh mynta kam shym la don satia kano kano ka khubor ba la siat ha shilynter ka International Border ha Samba bad Kathua distrik.
Ka sien kaba khatduh eh jong ka jingsiat sha shiliang pud ka pynthut shuh shuh ïa ka jingïateh kular ban sangeh ïasiat kaba la ïasoi ha u bnai Rymphang, 2021, kaba mynta la ïohi ba kam don jingmyntoi namar ka jingpynkheiñ man ka por jong ka Pakistan ha kylleng u LoC bajrong 740 km.
Naduh ka miet jong ka 24 tarik, Ïaïong, katto katne kynta hadien ba ka India ka la pynsangeh ïa ka Indus Waters Treaty kum ka jubab halor ka jingshah thombor jong ki lehnoh ha Pahalgam, ki shipai Pakistan ki la thombor bunsien ïa ki jaka jong ka India ha shilynter jong u LoC, kaba sdang na ka Kshaid Kashmir bad pynpur stet sha ka thaiñ Jammu.
Ka Pakistan ka la shim ïa ki sienjam ban siew kylliang, kynthup ïa ka jingkhang ïa ka lynti jong ki liengsuiñ jong ka na ka bynta ki liengsuiñ India, ka jingkhang ïa ka lynti ïaid khappud Wagah, bad ka jingpynsangeh ïa ka khaïi pateng arliang mamla.
Ka khappud India bad Pakistan bajrong palat 3,300 km, la phiah ha ki lai tylli ki bynta: u pud International Border (IB), uba jngai kumba 2,400 km naduh Gujarat haduh Akhnoor ha Jammu; u Line of Control (LoC) uba jrong 740 km uba phiah ïa ka Jammu & Kashmir; bad u laiñ uba jrong 110 km (Actual Ground Position Line) (AGPL), uba pynïakhlad ïa ka thaiñ Siachen Glacier.
