I. R. Dkhar
Dangshen ngi la ïohi na ki Kotkhubor ba u Chief Minister ka Meghalaya un ïa pynbeit noh ïa u pud u sam hapdeng ka Meghalaya bad Assam kaba dang sahteng. Kane ka jingïapynbeit pud ka la dei ban dep lah slem hynrei ka jingbuh por na ka daw kawei hadien kawei pat. Lada lait u Chief Minister ka Meghalaya, u Chief Minister ka Assam um lait lada lait u Chief Minister of Assam, u CM ka Meghalaya un lait lait. Kumta shi kumta kawei ka kam hadien kawei pat. Katba ki para jait Khasi-Pnar pat ki nang ïakynduh ïa ki jingeh jingjynjar har rukom. Ma ngi ki paidbah ngin ong kumno khamtam kiba shong sha ki khappud kiba don ka jingïakajia. Imat haba shu peit ki Nongïalam, ki Nongmihkhmat, ki MLA, ki Minister jong ka Jylla jong ngi, ki kwah thet-kti. I kumta ki kwah beit ba u Chief Minister of Meghalaya un kitkhlieh marwei. Ha ka jingshisha la dei ba ki Nongïalam, ki Nongmihkhmat paidbah, ki MLA, ki Minister ki dei lang ban shimti lang ïa ka jingkitkhlieh. Ka jinglynga ka jingpisa jong ki para Khasi-Jaiñtia ka bym tip shuh
Kum ki nongshongshnong bad ki trai jaka trai muluk, la sngewdei ban ong ba u Chief Minister um dei ban shu shah ngiat shi shah ngiat tang marwei. La dei ba kitei ki heh ki haiñ kumba la ong haneng ki la dei ban shimti lang, ïatreilang bad ïa kitkhlieh lang kum ki trai ri trai jaka, na ka bynta ka ïap ka im jong ka jaitbynriew. Ka long thik kum ki player football, marwei la u tbit katno katno ruh, um lah ban leh eiei marwei. Ki khlieh Nongsynshar shnong, ki it ki hima bad ki bor jong ki District Council, bad kumta ter ter, kum ban shu ong noh ki don ka jingtip bad ka jingïakitkhlieh lang ban ïa pyndep noh ba kan nym jia shuh hadien habud.
Ngi sngewsynei ïa la ki paradoh parasnam jong ka Khasi Hills bad Jaiñtia Hills kiba shong ha ki khappud bad ka Assam bad Bangladesh ruh kiba shem ïa ki jingeh jingjynjar man ka por. Ym da donkam ban jer lut kiei kita kumba paw na ki Kotkhubor ba ki shong ha ka jingsyier. Nangta, la ju ïohsngew ruh ba ka Assam ka la tei ïa ki surok bad ki pyntrei ïa ki skim bapher bapher ban pynpaw ïa ka jingkwah jong ki ïa ki briew jong ngi ban ïasoh sha ka Assam. Ki briew jong ngi pat kim kwah lano lano ruh ban ïasoh sha ka Assam. Tip lehse lada ki la shu iehbeiñ sah, lehse ki lah ban leit noh sha Assam, mano ban tip ? Bad ka Jylla pat kan nang duh noh ïa la u pud u sam.
Namarkata, la sngew ban ong kyrpad ïa ki heh ki haiñ, ki kynrem ki lyndan bad kito baroh kiba dei ban ïatreilang ban ïakitkhia lang na ka bynta ka jingbha jingmiat bad ba kan kut kata ka jingïashrut bad ka jingïatam pud bad ka jingïashoh ïadat hapdeng ka Meghalaya, Assam bad Bangladesh.
