Amaravati, Jymmang:
U MP ka YSRCP u Y S Avinash Reddy u la pynskhem ba ka seng kan ïai bteng ïa ka jingïakhun pyrshah ïa ka aiñ Waqf (Amendment) haduh ban da weng noh ïa ka.
Haba kren ha ka ‘Long March’ ba la pynlong da ka All India Muslim Personal Law Board kum ka jingpyrshah ïa kane ka aiñ ha ka sngi U Blei, u Avinash Reddy u la ong ba ka YSRCP ka la dep ban ujor da ka dorkhas ha Supreme Court ban tuklar ïa kane ka aiñ.
Haba ai jingkren ha ka jingïalang ha Seven Roads Junction ha ka nongbah, u Avinash Reddy u la kdew ïa ki katto katne ki jingduna kiba don ha katei ka aiñ.
“Ngi la pyrshah ïa ka Waqf Bill ha Rajya Sabha bad Lok Sabha. Ka sorkar pdeng ka dei ban sngewthuh ïa ka jingsngew jong ki klur ngut ki Muslim, bad ban weng mardor ïa katei ka aiñ bymhok”, u la ong.
U Deputy Chief Minister barim u S B Amzath Basha u la pynpaw ïa kajuh ka jingmut, da kaba maham ba ki jingïakhih kin dang ïai bteng haduh ban da weng noh ïa katei ka aiñ.U Mayor K Suresh Babu, MLC Ramachandra Reddy, u president ka YSRCP distrik u P Ravindranath Reddy, u Afzal Khan u nongïalam ka Congress, bad katto katne ngut ki nongïalam Muslim ki la kren.
U nongïalam ba rangbah jong ka TDP u V S Amir Babu u la mad ïa ka jingshah kynthoh haba u la pyrshang ban ïadon bynta lang ha katei ka jingïakhih. Ki nongpynïaid ki la khanglad ïa ka jingrung jong u, da kaba kynnoh ba u don arliang mamla namar ba u kyrshan ïa ka Bill ha Parliament, katba u dang pyrshang ban pyni ïa ka jingïatylli ha ki surok.
