New Delhi, Jymmang:
U Myntri ka tnat Pohïing jong ka sorkar pdeng, u Amit Shah, ha ka sngi Balang, u la kynthoh halor ka jinghiar thma jong ki shipai India pyrshah ïa ki khyndai tylli ki ktem lehnoh ha Pakistan bad ka Kashmir ba la synshar da ka Pakistan, da kaba ong ba katei ka jinghiar thma ka dei ka jingkynthoh jong u Bharat halor ka “jingpynïap shyrkhei ïa ki para jong ngi kiba lui-lui ha Pahalgam.” U la ong ruh ba u sngew sarong ïa ki shipai jong ka India.
“Sngew sarong ïa ki shipai jong ngi. Ka Operation Sindoor ka dei ka jingkynthoh jong ka Bharat ïa ka jingshah pynïap beiñ jong ki para ba lui-lui jong ngi ha Pahalgam,” u la thoh ha ka rynsan phah khubor ha ka X. U la ong ba ka sorkar India kan ai ïa ka jubab kaba biang ïa kano kano ka jinghiar thma ïa ka ri India.
“Ka sorkar u Modi ka la kut jingmut ban ai ka jubab kaba biang ïa kano kano ka jingshah thombor ha ka India bad ki briew jong ka. Ka Bharat ka dang ïai bteng ban pynduh jait ïa ki kam lehnoh na ki tynrai jong ka,” u la bynrap.
