New Delhi, Jymmang:
Kum ka jingai jubab halor ka jingjur jong ka jingïakynad bad ka Pakistan hadien ka jingshah thombor ha ki lehnoh ha Pahalgam dang shen kaba la shim ïa 26 ngut ki mynsiem briew, ka Ministry of Home Affairs (MHA) ka la bthah ïa baroh ki jylla bad ki jaka jong ka sorkar pdeng ban pynlong ïa ka jingïalehkai Mock Drill kaba heh bha ha ka sngi Balang, 7 tarik u Jymmang. Ïa ki dril la pynlong ha kylleng ki jaka ha palat 250 tylli ki distrik ha India kum shi bynta ban pynkhreh na ka bynta ki jingma kiba lah ban mih na “ki nongshun”, kynthup ïa ki jinghiar thma da ki liengsuiñ bad ki jingpynkynriah jaka sah ïa ki paidbah.
Ka Ahmedabad, kawei na ki jaka sor ba kongsan jong ka Gujarat, ka don napdeng ki 244 tylli ki jaka ïada paidbah ba la ithuh, kiba pynkhreh na ka bynta kane ka jingïalehkai. Ka jingbthah jong ka MHA ka thmu ban pynkhlaiñ ïa ka jinglah jong ka ri ban ïarap kyrkieh bad ka jinglong ba la pynkhreh ha ka jingshai jong ki jingma kiba nang kiew ha ka liang ka jingïada.
Ka tnad pynlip ding, ka tnad ïada paidbah bad ki tnad pahara ïing, ha ka jingïakren kaba dang shen, ka la pynpaw ïa ka jingdonkam kyrkieh jong kum kine ki jinghikai haba kheiñ ïa ka jingkylla jong ki jingma kiba mynta. Kane ka sienjam ka dei shi bynta jong ka jingpyrshang kaba kham heh jong ka sorkar pdeng ban pynthikna ïa ka jingïatreilang bad jingpynkhreh kaba kham bha ha kylleng ki tnad treikam jong ka thaiñ bad ka ri.
Ka India kan pynlong ïa ka jingpyntreikam na ka bynta ban ïada ïa ki paidbah ha ka ri baroh kawei hynnin ka sngi, kaba kynthup ïa palat 244 tylli ki distrik ba kongsan kiba don ïa ki jaka sah shipai, ki jaka shna Nuclear, bad ki jaka pynkhuid umphniang. Kane ka jingpyntbit bad jingai jinghikai kaba heh ka long hadien ka jingthombor jong ki lehnoh ha ka 22 tarik u Ïaïong ha Pahalgam kaba la shim ïa 26 ngut ki riew paidbah. Kane ka jinghikai ka thmu ban kyntiew ïa ka jingpynkhreh na ka bynta ki jingma kiba lah ban mih lyngba ki kam kum ki siren jong ki liengsuiñ, ka jingpynlip bording, bad ki jinghikai ban pynkynriah jaka ïa ki briew.
