Bengaluru, Jymmang:
U MP barim jong ka Congress Lok Sabha, u VS Ugrappa, u la kyntu ïa ka BJP, kynthup ïa u Myntri Rangbahduh ka ri, u Narendra Modi, ba un jubab ïa ka ïingbishar jong ka CBI, kaba pynrem ïa u Myntri barim bad MLA jong ka Gangavathi, u Gali Janardhana Reddy, bad rai pynrem ïa u, da kaba set patok hynñiew snem, halor ka mukotduma jong ka kam tih beaiñ ïa ki marpoh khyndew ha Obulapuram.
“U Reddy bad ka kynhun jong u ki la shalan be-aiñ ïa u mawshun shabar ri haduh 29 lak ton. U nongbishar hi u la ong ba ka dor jong u ka long T.884 klur. Mynta u la shah rai pynrem. Nga dawa ba ki nongïalam ka BJP kiba don ryngkat bad ki bad u Modi ki dei ban jubab. Ha ka kaiphot jong nga, nga don ban ong ba palat ïa ka T. 1 lak klur ka pisa ka dei kaba la shah lute,” u la ong, ha ka jingïakren bad ki nongthoh khubor ha ka ophis treiakm jong ka KPCC.
U Ugrappa u la dawa na ka sorkar jylla ba ka dei ban kheiñ ïa ka jinglute be-aiñ jong u Reddy kum ka jingsahkut jong ka khajna khyndew, bad ban kurup ïa ki mar ki mata jong baroh kiba don shadien jong ka.
“Dei ban leh eiei pyrshah ïa kito kiba ïalam ïa ka sorkar jylla ha kata ka por, bad ki ophisar kiba ïoh jingmyntoi na ka”, u la ong.
“Ka jingpynshitom patok hynñiew snem jong ka CBI Special Court ïa u Janardhana Reddy ha ka mukotduma tih mawshun beaiñ ka phah ïa ka khubor kaba shai sha ka ri baroh kawei bad ïa ki riew bamsap.
“Ha ka por ba ka jingtih mawshun beaiñ ka dang ïaid naduh u snem 2000 haduh u snem 2006, ka sorkar synrop ba la ïalam da u HD Kumaraswamy ka la don ha ka bor, bad nangta u Myntri ba dei khmih ïa ki khlaw u C Chennigappa u la thoh sha u Myntri Rangbah ka jylla, da kaba pynpaw ba ka jingtih beaiñ ïa ki marpoh khyndew ka dang ïaid. Ha kaba hadien kane, nga la dawa da ka jingtohkit jong ka kynhun CBI ban tohkir halor kane ka jingtih beaiñ ïa ki marpoh khyndew ha ka jingïakren hapoh ka dorbar ha ïingdorbar,” la ong u MLC barim.
