New Delhi, Jymmang:
Hadien katto-katne kynta ba ka India ka la pynlong ïa ki jinghiar thma ba thikna ïa ki jaka lehnoh ha PoK bad Pakistan, ym duna ïa ka 250 tylli ki liengsuiñ kiba leit bad wan na ka kad liengsuiñ jong ka Delhi la pynsangeh noh ha ka sngi Balang.
Shiphew minit hadien ba ka jingleit hiar thma ka la kut, ki liengsuiñ ki la leit ban khmih bniah ïa ka Platform Flightradar24 ba la pyllait ïa ki dur kiba pyni ba kiba bun na ki liengsuiñ jong ki nong Pakistan ki la shah pynphai noh na ka kad liengsuiñ.
Ka tyllong khubor na ka kad liengsuiñ, ka ïathuh ba 16 tylli ki kad liengsuiñ ha India, kiba la poi kylleng ki san tylli ki jylla jong ka J&K, Himachal Pradesh, Rajasthan, Gujarat, bad Punjab, ki la shah khang treikam na ka bynta ki riew paidbah.
Ka tyllong khubor ka la ong, “Kumba ka long mynta, la ïathuh ïa ngi ba ka jingkhang ka long kaba khlem kut bad yn sa pyntip shuh shuh ïa ki tarik ban plie hadien.”
Hadien kata, ka Air India, ka la pynbna ba ar tylli ki liengsuiñ kiba leit sha ka Amritsar International Airport, kawei na Birmingham bad kawei pat na Gatwick, la pynphai sha Delhi.
Ha ka kyrwoh, ka la bynrap ba ka Air India, ka la pynsangeh lut ïa baroh ki liengsuiñ jong ka, kiba leit bad wan na kine ki station kiba kynthup ha Jammu, Srinagar, Leh, Jodhpur, Amritsar, Bhuj, Jamnagar, Chandigarh, bad Rajkot, tad haduh ka 10 tarik, Jymmang.
Ka Indigo ka la ong, “Namar ka jingpynbna jong ka sorkar halor ki jingkhang ïa ki liengsuiñ, palat 165 tylli ki liengsuiñ IndiGo na ki kad liengsuiñ ba bun jait (Amritsar, Bikaner, Chandigarh, Dharamshala, Gwalior, Jammu, Jodhpur, Kishangarh, Leh, Rajkot, bad Srinagar) la pynsangeh noh haduh ka por 5:29 mynstep ha ka 10 tarik, Jymmang, 2025.”
Ka Spicejet ka la pynbna ruh ba kan pynsangeh noh ïa ki liengsuiñ jong ka kiba leit bad wan na Leh, Srinagar, Jammu, Dharmashala, Kandla bad Amritsar na ka bynta kajuh ka por ba la buh.
Ha kajuh ka por, ka Akasa Air ka la pynsangeh noh ïa ki liengsuiñ ban leit bad wan na Srinagar.
Kawei ka liengsuiñ jong ka Thai Airways na Frankfurt ban leit sha Bangkok ka dei ka liengsuiñ TG-921 kaba la pynkylla sha Dubai.
