New Delhi, Jymmang:
U Myntri ka tnat ïada ri u Rajnath Singh, u la ïakynduh ïa u Chief of Defence Staff u Anil Chauhan bad lai ngut ki heh shipai ha Delhi, ha ka step jong ka sngi Thohdieng, khyndiat kynta hadien ba ka India, ka la khanglad bad ïaleh pyrshah ïa ka jingthombor jong ki ‘namding bad ki Drone na Pakistan, kiba thmu pyrshah ïa ki ktem shipai bad kiwei kiwei ki nongbah.
Ïa kane ka jingïalang la pynlong ban bishar bniah ïa ka jinglong jingman ha ka liang ka jingshngaiñ hadien ba dang shen ka India ka la pynlong ïa ki jinghiar thma sha shiliang pud hapoh ka Operation Sindoor.
Ka India, ka la khanglad ha ka sien kaba ar jong ka jinghiar thma liengsuiñ jong ka Pakistan ïa ki ktem shipai bad katto-katne ki nongbah ha Rajasthan, Gujarat, bad Punjab, kaba la sdang ha ka por kumba 8:30 baje eiei mynmiet.
Ka Pakistan ka la thombor ruh ïa ki ktem shipai ha Jammu, Pathankot, bad Udhampur, ha kaba ki shipai India ki la pynphai kylla khlem da pynslem.
Ka jingpyllip bording kaba jur, kumba la ïoh jingtip, la ong ba ka la long ha Srinagar, Jammu, bad katto-katne ki jaka ha Punjab bad Rajasthan, ha ka por mynmiet.
Ki tyllong khubor ki ïathuh ba bun ki ktem shipai jong ka Pakistan kiba don ha shilynter jong ka Line of Control ki la shah pynjot namar ba ki shipai India ki la pynphai kylla da kaba tyngeh ïa ki jingsiat sha shiliang pud. La pyndonkam da ki ‘namding kiba la pynïaid ïa ki tank ban siat ïa ki jaka sah jong ki shipai, ki la ong.
“Ki shipai Pakistan ki la pynlong ïa ki jinghiar thma bunsien da kaba pyndonkam da ki Drone bad kiwei kiwei ki tiar siat ha baroh kawei ka khappud ba shaphang Sepngi hapdeng shiteng synñia jong ka 8 bad 9 tarik, Jymmang, 2025. Ki shipai Pakistan ki la pynkheiñ ruh ïa ka aiñ sangeh ïasiat da bun sien ha shi bynta jong u LoC ha Jammu & Kashmir,” la ong ka tnad shipai.
