Kochi, Jymmang:
Ka kynhun lehnoh Lashkar-e-Taiba (LeT) ka la pynrung dkhot ïa ki briew na Kerala ha u snem 2008 ban hikai pyntbit ha ki ktem jong ka ha Kashmir (PoK) ba la bat da ka Pakistan bad Pakistan-occupied Kashmir (PoK) Pakistan, kiba la shah pynpra ha ka ‘Operation Sindoor’, ki jinghiar thma “ba thikna” jong ki shipai ka tnat India Armed Forces ha ka 7 tarik u Jymmang.
Ki don san ngut ki samla ïa kiba la tip kyrteng kum u Fayiz bad u Fayaz na Kannur, u Abdul Rahim bad u Abdul Jabbar na Malappuram bad u Yasin na Ernakulam – la jied da u dkhot jong ka kynhun lehnoh LeT u Thadiyantavide Nazeer ban ai jinghikai hapoh katei ka kynhun bad la phah ïa ki sha ka ktem jong ka LeT.
La kynnoh ba u Nazeer bad ki nongïarap jong u ki la pynngop ïa ki samla lyngba ki klas ba u pynlong ha ki jaka bapher bapher jong ka thaiñ ba shaphang Shatei jong ka Kerala.
Ka jingthmu ka long ba hadien ba la dep pyntbit, ar ngut kin leit phai noh sha Kerala katba kiwei pat ki lai ngut kin leit pynïasoh ïalade bad ka ‘jihad’ ha Pakistan bad Afghanistan.
Hynrei ki bor pahara, kiba la khanglad ia ki khubor ba kine ki briew ki la phah sha Kerala, ki la ker kut ïa ki ha u snem 2008.
Saw ngut ki briew lait noh u Jabbar ki la shah pynïap ha ki shipai ha ka jingïasiat kaba markylliang kaba la jia ha Kupwara ha Jammu & Kashmir. Hadien kane la kem ïa u Jabbar da ki pulit ha Hyderabad.
Dei katto katne ki jingeh kiba u Yasin bad u Fayiz ki la ïakynduh ha ka ktem jong ka LeT kiba la pynlong ïa ki ban sdang pyrkhat noh da kumwei. Kine ki arngut ki kwah ban leit phai noh sha la ïing bad u Rahim u kwah ba u Nazeer un tuklar ban pynbeit ïa ki jingeh.
U Nazeer u la ïakren bad kitei ki arngut lyngba ka phone bad pynngeit ïa ki ba ka jingwanphai na ka jihad kam dei kaba la ai jingbit ha ka niam.
Shuh shuh, u heh shipai jong ka LeT ha katei ka ktem u la byrngem ruh ïa ki ban pynrung dkhot biang.
Ki jingtohkit ki la pynpaw ba ka LeT ka la ïakynduh beit bad ki katto katne ki kynhun ha Kerala.
U K P Sabir ba la tip ruh da ka kyrteng kum u Ayub, uba na Kannur, la ngeit ba u dei u briew uba kongsan ban pyntreikam ïa katei ka plan jong ka LeT ha Kerala bad u la don bynta lang ha baroh ki jingïakren.
U Sabir u la leit sha Delhi ar sngi shuwa ka jingleit jong kiwei bad u la pynbeit lut ïa ki jingdonkam ha ka nongbah. Hadien ba katei ka kynhun ka la poi ha Delhi, u la leit ban synran ïa ki sha Kashmir bad u la aiti hi ïa ki sha ka kynhun LeT.
U Sabir u la mih noh na katei ka ri hadien ba la mih khubor halor katei ka jingïakynduh ha ki lad pathai khubor. Une haduh mynta u dang phet rieh na kti jong ka aiñ.
Ka LeT ka la ïarap ïa u Nazeer ban phet sha Bangladesh bad ban sah hangtei kumba shisnem eiei shwa ba ka jingshah kem jong u ha u snem 2009 kan kut noh.
Ka NIA Court ha u snem 2013 ka la lap ba 13 ngut ki briew ki donkti ha katei ka kam bad la rai pynrem ïa ki da kaba set phatok shi jingim.
Ka Kerala High Court ha u snem 2022 ka la pynskhem ïa ka rai jong ki 10 ngut, bad ka la pyllait ïa lai ngut ki briew. U Wali ba la tip ruh da ka kyrteng kum u Reehan, u dei u nong Pakistan, uba la shah kynnoh ha katei ka kam, hynrei ym shym la kem satia ïa u.
