Jaipur, Jymmang:
Ar sngi hadien ba ka India ka la siat da ki ‘namding ba la pynkhreh lypa ha Pakistan bad ha Pakistan-Occupied Kashmir ban siew kylliang ïa ka jingthombor jong ki lehnoh ha Pahalgam, ki jylla khappud ka Rajasthan bad Punjab ki don ha ka jinglong jingman kaba la pynkhreh bha.
La pynsangeh noh ïa ki shuti jong baroh ki pulit bad la khanglad ïa ki jingïalang paidbah katba ki bor synshar shnong ki dang pynkhreh na ka bynta kano kano ka jingjur na ka liang ka Pakistan.
Ka Rajasthan, kaba ïasam khappud bad ka Pakistan, kaba jngai 1,037 km, ka don ha ka jingpahara kaba jur bha.
La khang khyrdep lut ïa u pud u sam bad la ai hukum ïa ki shipai Border Security Force ba kin siat lada ki ïohi ïa kino kino ki kam kiba suba.
Ki shipai suiñ jong ka India ki don ha ka jingpahara kaba jur bha. Ka jingleit jingwan jong ki liengsuiñ na ki kad liengsuiñ Jodhpur, Kishangarh bad Bikaner, la pynsangeh noh haduh ka 9 tarik, Jymmang, namar ba ki liengsuiñ ïapom, ki ïaid pahara ha suiñ bneng ha ka thaiñ Sepngi.
Ki kor ïada ‘namding ki la treikam, la ïathuh ka tyllong khubor.
Ki liengsuiñ Sukhoi-30 MKI ki dang pynlong ïa ka jingpahara suiñ naduh Ganganagar haduh Rann jong ka Kutch. Ki skul ha Bikaner, Sri Ganganagar, Jaisalmer, bad Barmer ki la khang khyrdep lut bad ki eksamin kiba dang ïaid shakhmat la pynkynriah noh. La pynsangeh noh ïa ki shuti jong ki pulit bad ki nongtrei jong ka Rel.
Ki shnong khappud ki don ha ka jingpynkhreh kaba jur bad ki plan ban pynkynriah ki don ha ka jaka na ka bynta ban ïarap kyrkieh.
La pyntreikam ruh ïa ki kor pyrshah Drone hajan khappud. Na ka bynta ka Jaisalmer bad Jodhpur la pynmih hukum ban pynlip bording naduh shiteng miet haduh 4 baje mynstep.
Ka jingpynlip bording ka buh jingeh ïa ki liengsuiñ kiba la tbit bha kiba stet bha, kaba pynlong ïa ki nongñiah liengsuiñ jong ki nongshun ban shem jingeh ban hiar thma.
Ha Punjab, la pynsangeh noh ïa ki shuti jong baroh ki pulit bad la khang ruh ïa ki jingïalang paidbah.
U Myntri Rangbah ka jylla u Bhagwant Mann u la pynsangeh ruh ïa baroh ki prokram jong ka sorkar namar ka jingkulmar ha khappud.
Ka India ha ka sngi Balang ka la pynbthei 24 tylli ki namding ban pynjot ïa ki jingtei jong ki lehnoh ha ki khyndai tylli ki jaka ha Pakistan bad ha Kashmir kaba la bat da ka Pakistan.
Katei ka jingpyntreikam kaba la ai kyrteng code, ka Operation Sindoor, ka dei kum ka jingpynrem ïa ka jingthombor jong ki lehnoh ha Pahalgam, ha kaba 26 ngut ki briew ba lui-lui, ki la shah siat ïap.
Ka India ka la ban jur ba kam shym la hiar thma ïa kano kano ka jaka buh shipai ha Pakistan bad ba ka jinghiar thma jong ka ka long tang ban pynpra ïa ki jaka ai jinghikai ïa ki lehnoh ba la pyndonkam ban thmu ban hiar thma ha ka khyndew ka shyiap jong ka India.
Ka Resistance Front, kaba la kam ïa ka jingkitkhlieh halor ka jingthombor ha Pahalgam, ka dei ka kynhun jong ka kynhun lehnoh jong ka Pakistan, kaba la khang pyrshah, ka Lashkar-e-Taiba.
Ka Operation Sindoor ka la thmu kyrpang ïa ki jaka ba la pyndonkam da u Lashkar bad ka Jaish-e-Mohammed na ka bynta ban ai jinghikai ïa ki lehnoh.
U Foreign Secretary u Vikram Misri u la ong ba ki kam jong ka India ki long kiba la thew, ki bym pynjur, kiba ïahap, bad kiba don ka jingkitkhlieh.
“Ki la pynleit jingmut ha kaba pynpra ïa ki jingtei jong ki lehnoh bad ban pynthut ïa ki lehnoh kiba lah ban shah phah sha kylleng ka ri India,” u la ong.
Hynrei u Myntri Rangbahduh jong ka Pakistan, u Shehbaz Sharif, ula ong ba katei ka jingsiat namding jong ka India, ka dei ka “jingleh thma” bad ong ba ka ri jong u, ka don ïa ka hok baroh ban ai ïa ka “jubab kaba biang.”
