Srinagar, Jymmang:
Hapdeng ka jingpynkhlaiñ ïa ka jingpahara, ki shipai khappud ki la pynpulom ïa ka jingthmu rungtuh kaba jur jong ki lehnoh ha ka thaiñ Samba ha Jammu & Kashmir ha ka por miet.
“Ha ka por kumba 11 baje eiei mynmiet jong ka 8 tarik, Jymmang, ki BSF ki la khanglad ïa ka jingthmu rung tuh kaba jur ha International Boundary kaba don ha Samba distrik jong ka J&K”, la ong uwei u heh BSF.
Kane ka jingthmu ban rung tuh ka la jia hadien ba ki shipai Pakistan ki la pynbthei da ki Drone bad ki ‘namding ha ki bynta jong ka Jammu ha ka por janmiet.
Ki kor ïada suiñ jong ka India ki la khanglad bad pynhap ïa ki Drone bad baroh 8 tylli ki ‘namding ba la siat da ki shipai Pakistan ba thmu ïa ki jaka ba sah ki riew paidbah bad ki jaka ba don ki shipai kynthup ïa ka kad liengsuiñ Jammu.
Nalor ka jingbthei jong ki Drone bad ki ‘namding jong ka Pakistan, ki shipai Pakistan ki la pyndonkam ruh da ki suloi rit bad ki suloi heh ha shi lynter u Line of Control (LoC) naduh Uri ha shatei jong ka Kashmir haduh RS Pura ha ka thaiñ Jammu.
Kawei ka longkmie ka la ïap ha ka jingther jong ki shipai Pakistan ha Uri.
Ki shipai India hynnin ka sngi hapoh ka “Operation Sindoor” ki la thmu bad pynjot ïa ki jaka pyntreikam jong ki lehnoh ha Pakistan bad PoK. Napdeng ki ktem lehnoh ba la shah thombor ki kynthup ïa ka Jaish-e-Mohammad headquarter ha Bahawalpur bad ka Lashkar-e-Toiba headquarter ha Muridke. Ka ktem jong ki lehnoh Hizbul Mujahideen ruh ka la shah hiar thma ha ka por ba don ka”Operation Sindoor”.
