Hyderabad, Jymmang:
Lai ngut ki Commando kiba dei jong ka Greyhounds, ka kynhun pyrshah lehnoh jong ki pulit ka Telangana, ki la ïap bad lai ngut kiwei pat ki la mynsaw ha ka jingbthei jong u bom IED (Improvised Explosive Device) ba la buh da ki Maoist ha ka shnong Venkatapuram ha Mulug distrik kaba don ha khappud jong ka Chhattisgarh, ha ka sngi Palei, la ïathuh ki heh shipai.
Kane ka jingjia ka la jia ha ki jaka khlaw ba rben jong ki lum Penugolu Gutta, kiba long shibynta jong ki lum Karreguttalu jong ka Bijapur distrik ha Chhattisgarh, ki la bynrap.
Katkum ki khubor ba nyngkong, ki kynhun jong ki Greyhounds ki dang ïashim bynta ha ka jingkhynra khlaw ha ki khlaw ba rben jong ka Venkatapuram, hadien ka jingmih khubor ba ki don ki lehnoh Maoist kiba dang ïalum biang ha ki jaka khlaw Venkatapuram-Vajedu.
Kine ki shipai kiba la ïap ki kynthup ïa u Reserve Sub-Inspector (RSI) u Ranadheer bad ki shipai langrut kiba kynthup ïa u Sandeep bad u Pawan Kalyan. “Ïa ki metïap jong ki la pynkynriah sha MGM Hospital Mortuary ha Warangal na ka bynta ban leh ïa ka post-mortem,” ong uwei u heh pulit ka Mulug distrik ubym kwah ban pynpaw kyrteng.
Ki ophisar ba kham heh jong ka tnad pulit kiba kynthup ïa u DGP ka Telangana bad u Director General ka Greyhounds u Stephen Raveendra ki la poi sha kane ka Hospital ban ai burom ïa ki, la bynrap shuh shuh u heh pulit.
