Ngi kum ki briew ngi ïa mutdur ïa u Blei uba donbor bad uba khraw tam eh. Dei na kane ka daw ba ngi ngeit ba u Blei u long u nongthaw ïa kiei kiei baroh.
U blei u la thaw ïa ka lyer, ïa ka sngi bad u bnai, u la thaw ïa ki khlur bad ki met bneng. U la thaw ïa ki um bad ki duriaw bad ka khyndew. U la thaw de ïa ki mrad bad ki dohkha ba shong bad im ha ryngkew bad hapoh duriaw.
U la thaw ïa ki dieng ki siej, ki syntiew ki skud, ki phlang ki kynbat ba lai phew jait kiba mih hangne ha sla pyrthei u la thaw ïa ki lum bah ki lum rit bad ki them bad pynitynnad ïa ka mei – ma-riang.
U Blei u la thaw ïa ki jait par ba kordor kum ka ksiar, ki rupa, u dewïong, ka umphniang bad ki maw kordor bad kiwei kiwei ban pynbiang ïa ka jingdonkam u briew.
Bad ngi ngeit ruh ba u la thaw de ïa ngi ki briew ba kham jan bad u Blei. Ngi ki briew ruh ngi long ki jing-thaw jong u Blei bad baroh kiei kiei kiba don ha sla pyrthei bad hapoh duriaw.
Dei halor kine kiei kiei ngi ngeit namarkata ba u Blei u long uba khraw bad uba donbor tam eh halor baroh. Kumta ngi ong u Blei uba khraw (God is great)
C. B. Iawphniaw
