New Delhi, Jymmang:
Ki lad ïada suiñ hapoh ka Operation Sindoor – ba la sdang kum ka jinghiar thma pyrshah halor ka jingthombor ba shyrkhei jong ki lehnoh ba la kyrshan da ka Pakistan ha Pahalgam – ki dang ïaid shakhmat bad yn sa pynlong ïa ka jingpynshai kaba bniah ha ka por kaba biang, ong ka Indian Air Force (IAF) ha ka sngi U Blei hadien ba ka India bad ka Pakistan ki la mynjur ban sangeh ïasiat ha ka sngi Saitjaiñ.
Haba ïaroh ïa ka jingjop jong ka mishon, ka IAF ka la ong ba ka la pyndep hok ïa ki kam jong ka da ka jing-long kaba thikna bad kaba tbit, da kaba ïalam da ki jingthmu jong ka ri.
“Ka Indian Air Force (IAF) ka la pyndep hok ïa la ki kam ba la bynshet ha ka Operation Sindoor, da ka jinglong kaba thikna bad kaba tbit. Ïa ka jingpyntreikam la pynlong kum shi bynta ban ai ka jingïada bad ka jingshngaiñ ha ka ri. Naba ka jingpyntreikam ka dang ïai bteng, ka jingpahara ruh ka dang khlaiñ ha kylleng ki jaka. Ka tnat shipai IAF ka la kyntu sha baroh ba kin ai jingtip mar mar lada ki shem ba don ka jingpher ne ka jingsuba sniew ei ei,” ong ka jingthoh ba la wan na k atnat shipai IAF ha ka rynsan X.
Ka Indian Air Force (IAF) ka la pyndep hok ïa ki kam ba la bynshet ha ka Operation Sindoor, da ka jingtrei thikna bad ka jingstad. Ïa ki jingtreikam la pynlong ha ka rukom kaba thmu bad kaba rieh, kaba ïadei bad ki jingthmu jong ka Ri. Namar ba ki jingtreikam ki dang ïaid shakhmat.
Kane ka jingkren jong ka IAF ka la mih shisngi hadien ba ka India bad ka Pakistan ki la pynbna ba ki la mynjur ban sangeh ïasiat mardor bad ban sangeh lut ïa baroh ki kam pynibor ha kylleng ka khyndew, ka suiñbneng, bad ka duriaw, hadien saw sngi jong ka jingpynjur ïa ki kam shipai, ki jinghiar thma da ki Drone kiba pynïap briew sha shiliang pud bad ki jingsiat namding.
Hynrei tang katto katne kynta hadien katei ka jingpynbna, ka Jammu & Kashmir ka la shah pynkhih ha ka jingïohi ïa ki Drone bad bud sa ki jingbthei, kaba la pynlong ïa ki bor pahara ban pyntreikam ïa ki kor ïada suiñ ban pynhap ïa ki.
Ka India ka la pynlong ïa ki “jinghiar thma kiba thikna” hapoh ka Operation Sindoor halor ki khyndai tylli ki jaka thombor ha Pakistan bad PoK hadien ka jinghiar thma jong ki lehnoh ha Pahalgam kaba la pynïap ïa 26 ngut ki riew paidbah. Kitei ki jingshah thombor ki la pynïap ym duna ïa ki 10 ngut ki bahaïing jong u heh jong ka JeM, u Masood Azhar bad saw ngut ki nongïarap ba jan.
Ki jaka ba la thmu ki dei ki ktem jong ki shipai Pakistan ha Rafiqui (Shorkot, Jhang), Murid (Chakwal), Nur Khan (Chaklala, Rawalpindi) Rahim Yar Khan, Sukkur bad Chunian (Kasur). Ha ki jinghiar thma, ki ktem liengsuiñ ha Skardu, Bholari, Jacobabad bad Sargodha ki la mad ïa ka jingjulor kaba jur bha.
Katkum ki khubor, la ïathuh ba ka India, ka la pynher ïa u namding ba shyrkhei jong ka, u BrahMos, kum shi bynta jong ka jingkhynra ha ki ktem shipai jong ka Pakistan.
Ka jingïakynad hapdeng ka India bad ka Pakistan ka la kiew syndet hadien ba ki shipai India ha ka sngi Balang ki la pynlong ïa ki jinghiar thma ba thikna kiba thmu ïa ki jaka pynher ïa ki lehnoh ha Pakistan. Ka Islamabad naduh katei ka por ka la pyrshang ban thombor ïa ki katto katne ki jaka buh shipai bad ki riew paidbah ha ki khappud ba Shatei bad Mihngi jong ka India. Ka India ka la ong ba ka la jubab katkum ka jingdonkam.
