U Nongsaiñ Hima, 1969
Ka jingim jong u briew ha kane ka pyrthei, ka long shisha kaba tang shipor, bad ki tymmen hyndai ki ju ong ba ka pyrthei ka long tang ka ïing shong basah. Hynrei ha ine i por ba lyngkot, u briew la dei ban leh shibun ki kam, kiba kham kongsan, ki long ka Lawei – ong ka ïing ka sem, ja jaid ka khong bad ka jaidbynriew jong u.
Namarkata ka rukom im jong u briew uba pyrkhat tang na ka bynta ka jingbit jingbiang ïalade shimet ka long ka jingim kaba sep – ei.Ka la dei ka por, khamtam ïa ngi ki riewlum kiba rit paid,ba uwei pa uwei uba la wan mih sha kane ka pyrthei, u la dei ban kit khia ban ïada ïa la ki riti ki dustur u longshuwa bad ban imsngi ha la ka kam ka kam,ban khmih ia ka jingmanbha longbha jong ka jaidbynriew. Mynta, Lashai bad La shisngi.
Khnang ba kane ka jinglongbriew kan rung ha ki thied snam jong u paid riewlum, ka donkam ka jingïatip lem ka jingïasngewlem bad ka jingïatreilang ban tei ïa ka jaidbynriew ha baroh ki phang. Kum ban shu shim nuksa khyndiat, lada la iap thngan ki briew sha ki thaiñ – khappud Pakistan, ki briew kiba kham bit kham biang kum ha Shillong ne Jowai kam biang tang ban don tang ka mynsiem sngewsynei tang da ka ktien hynrei ki la dei ruh ban long kiba kloi ban iarap ïa kita ki paradoh parasnam kiba shem lanot. Ka shah beh kam ne beh skul kaba khlem shngain jong u nongbylla ne u khynnah shong skul dei ban ïeng ïaleh na ka bynta ka hok jong uta uwei.
Dei ha kane ka rukom kaba la dei ban thir ïa ka rukom im rukom sah, kaba lah shisha ban tei bad kyntiew ïa ka jaidbynriew. ïa kine kiei kiei, lah ban leh da ka jingïasngewthuh bad jingïamir jingmut lang jong iwei pa iwei bad ka jingïatreilang ha kajuh ka jingmut bad jingpyrkhat.
Hynrei kumba ka long mynta i sangsot ïa ka Ri, ba ïa kum kine kiei kiei ym don ba peit ne ñiewkor ïa ki, bad ba ym don ba salia ïa ka apot ka ban wan hap ïa ka Lawei. Ha kane ka liang, ka la long kaba i lyng-ngoh bad phylla shibun ba wat uba nang bastad, u samla pule ne uno uno u nongtreikam treijam um don jingsalia ban wad jingtip ïa kiei kiei, kiba lah ban pynim ne pyniap ïa ka Ri.Wat u briew uba shong hapoh sor ruh, niar ba un tip ïa kaei ka ban mih na ka. Ha kane ka liang, haba kylli ïa kiba bun, wat ha kane ka kam Hill State ka ba ktah ïa uwei pa uwei, ym don ba salia eh ban tip, aiu ka mut ka Nehru Plan, Federal Plan, Asoka Committee bad kaei kata ka Autonomous State.
Kumta ka long ka jingim jong kiba bun, wat kito kiba mon ïalade ban long ki Nongïalam bad Shakri ka ri, ki la want ang ban shong kynrong ha kane ka ïing Basa, khlem da don ka jingmut kaba skhem bad ka mynsiem ban aiti ïalade, na ka bynta ban shngain bad suk ka jaidbynriew ha ki snem ki ban bud.
