New Delhi, Jymmang:
Ka Congress ka la pynmih ïa ka jingpynbna ban pynpaw ïa ka daw sha u MP barim u Laxman Singh, u para barit jong u Digvijaya Singh ba la rim bha ha ka seng, da kaba ong ba ki jingkren “ba pynjah burom” jong u kiba thmu ïa ki heh nongïalam jong ka seng, kynthup ïa u Rahul Gandhi, ki la “long palat ïa baroh ki pud ba lah ban pdiang”.
Ka la ong ba ki jingkren jong u ki la wanrah “ka jingpynjot kaba jur” ïa ka “dur bad ka burom” jong ka seng. Ha ka 25 tarik u Ïaïong, u Laxman Singh u la thombor ïa ki nongïalam ka seng hadien ka jingshah thombor ha Pahalgam.
“U Rahul Gandhi bad u Robert Vadra ki long kiba biej. Ka ri ka mad ïa ki jingeh na ka jingbym kot jingmut rangbah jong ki,” u la ong ha ka jingïalang sngewlem kaba la pynlong ban ai burom ïa kiba la shah pynïap ha Pahalgam.
Ïa kane ka jingpynbna la pynmih sha u Singh ha ka 9 tarik u Jymmang da u Member Secretary jong ka Disciplinary Action Committee (DAC) jong ka seng u Tariq Anwar.
Ka la ong, “Kane ka long ban wanrah sha ka jingtip jong phi ba la ïoh pdiang ïa ka jingujor na u heh ka MP Congress u Jitu Patwari bad na u General India Congress Committee (AICC) ba dei peit ïa u MP u Harish Chaudhary ha kaba ïadei bad ki jingkren paidbah ba man ka por jong phi kiba la wanrah ïa ka jingsniew kaba khraw ïa ka dur bad ka burom jong ka Congress.”
“La kdew shuh shuh ba ka jingkren jong phi dang shen ka la palat ïa baroh ki pud kiba lah ban pdiang, khamtam eh ïa ki jingkren pynjah burom bad khlem burom ïa ki nongïalam ba ha-khliehduh jong ka seng, kynthup ïa u nongïalam ba donburom jong ka Liang Pyrshah ha Lok Sabha u Rahul Gandhi,” ka la ong.
“Da kane la pynmih ïa phi ïa ka jingpynbna ban pyni ïa ka daw bad la bthah ïa phi ban ai ïa ka jingpynshai da ka jingthoh hapoh 10 sngi naduh ka sngi ba phi ïoh ïa ka jingpynbna,” la bynrap shuh shuh ka jingpynbna.
Ha ka 25 tarik, Ïaïong, u la kynthoh ruh ïa u Myntri Rangbah ka Jammu & Kashmir, u Omar Abdullah, da kaba ong ba u lah ban “ïakynduh lang bad ki lehnoh”.
“Ka jingkren jong u Robert Vadra ba ki lehnoh ki la hiar thma namar ba kim shah ïa ki Muslim ban ai namaz ha surok kam dei tang ka jingbym don jingkitkhlieh hynrei ka dei ruh ka jingkren kaba buh jingma ïa ka jingshngaiñ jong ka ri.
Haba la ïakren bad uwei u nongïalam ba rangbah jong ka Congress na katei ka jylla u la ong khlem da kwah ban pynpaw kyrteng, “Ki sngi jong u Singh ki la kut noh ha ka seng.”
