New Delhi, Jymmang:
Hapdeng ka jingsiat bom mortar kaba jur bad ka jingsiat Drone jong ka Pakistan, hynñiew ngut ki briew, kynthup ïa uwei u heh ophisar jong ka Jammu & Kashmir bad arngut ki ophisar pahara, ki la duh ei ïa la ka jong ka jingim. Palat 25 ngut kiwei pat ki la mynsaw ha ka thaiñ Jammu ha ka sngi Saitjaiñ.
Kine ki jingjia ki la jia tang shuwa ba ka India bad ka Pakistan kin mynjur ban sangeh noh ïa ka jingïaleh pyrshah. Ka jingkulmar ka la nangjur shuh shuh hadien ba ki shipai India ki la thombor ïa ki jaka pynher pyntriem ha Pakistan bad ha Kashmir ba la bat da ka Pakistan ha kaba sdang jong kane ka taïew.
Ki nongshong shnong jong ka nongbah Jammu bad ki shnong ba marjan ki la shah kyndit ha ki jingsawa jong ki liengsuiñ bad ki jingbthei kiba jur bha ha ka por 5 baje mynstep. Bun ki nongshong shnong khappud ki la shah ïa ka jingbym ïohthiah namar ka jingshah siat bom kaba jur sha shiliang khappud.
Ki heh jong ka tnat ïada ri ki la ïathuh ba ka jingjur jong ka Pakistan da ki jingbthei Drone bad kiwei kiwei ki tiar ïaleh ka dang ïai bteng ha ki khappud ba shaphang Sepngi ha ka sngi Saitjaiñ.
U Additional District Development Commissioner Rajouri, u Raj Kumar Thapa, u la mynsaw jur, na ka jingdei jong ki kuli ba la siat ïa ka ïingsah jong u ha ka nongbah Rajouri. La pynkit mar mar sha Government Medical College hynrei u la khlad noh na ka jingmynsaw. Haba pynpaw ïa ka jingsngewsih, u Myntri Rangbah ka jylla u Omar Abdullah u la ong, “Ka khubor kaba pynsngewsih na Rajouri. Ngi la duh noh ïa u ophisar ba aiti lut jong ka tnad synshar jong ka Jammu & Kashmir.”
U Subedar Major Pawan Kumar na Himachal Pradesh u la khlad noh ha ka jingsiat jong ka Pakistan hajan ka jaka sah jong u ha Krishna Ghati Sector jong ka Poonch.
Uwei u heh ophisar jong ka tnad pahara khappud u la ïathuh ba u Sub-Inspector Mohammed Imteyaz u la leh ïa ka jingaiti kaba khraw tam ha ka por ba siat sha shiliang pud katba u dang ïalam na khmat ha shilynter u pud u sam jong ka pyrthei ha ka bynta jong ka R S Pura.
Ha ka nongbah Rajouri, ka Aisha Noor, kaba dang ar snem ka rta bad u Mohd Shohib, uba dang 35 snem ka rta, ki la ïap, katba lai ngut kiwei pat, ki la mynsaw, na ka jingshah siat Mortar hajan kawei ka jaka ba don marjan bad ka karkhana.
Ha ka shnong Kanghra-Galhutta jong ka Poonch distrik, ka Rashida Bi, kaba 55 snem ka rta, ka la duh noh ïa la ka jong ka jingim, hadien ba u bom mortar, u la dei ha ka ïing jong ka.
Sa lai ngut ki briew ki la mynsaw ha ka jingshah siat bom kaba jur ha Poonch.
U Zakir Hussain, uba la 45 snem ka rta, ula shah pynïap ha ka shnong Kheri Keran, kaba don sha kyndong jong ka Jammu.
Ha kane ka juh ka jingjia arngut kiwei pat kynthup ïa kawei ka khynnah kynthei ki la mynsaw. Saw ngut ki briew ki la mynsaw na ka jingbthei jong ki bom bad ki jingpynhap tiar siat ki Drone kiba la suba ba ki dei ki jaka sah briew ha ka nongbah Jammu, kynthup ïa ka Rehari bad ka Roop Nagar.
Ha ka 9 tarik u Jymmang, ha ka por 9 baje eiei, ka Pakistan ka la siat ïa ki jaka sah jong ki BSF ha ki bynta jong ka Jammu khlem da pynkhihwin.
Ki BSF ki la jubab katkum ka jingdonkam, kaba la wanrah ïa ka jingjulor kaba khraw ïa ki jaka sah jong ki shipai Pakistan Rangers ha shilynter jong u khappud International Border. “Ka jingkut jingmut jong ngi ban ïada ïa ka jingsynshar jong ka India ka long kaba khlem jingkylla,” la ong ka kynhun shipai Jammu ha ka rynsan X.
Ïa ki lyngkhot lyngkhai jong ki Drone kamikaze jong ka Pakistan kiba la shah bat da ka tnat ïada suiñ jong ki shipai India la lap ha ki madan ba lait ha ki katto katne ki jaka, kynthup ïa ka Bishnah bad Parmandal ha Jammu. Ki pulit ki la kyntu ïa ki paidbah ba kim dei ban ktah ne pynkhih ïa kino kino ki tiar kiba suba ne ki UAV kiba la hap.
Ka jingïakynad hapdeng ka India bad ka Pakistan ka la nang jur bha hadien ba ki shipai India ki la pynlong ïa ki jinghiar thma kiba thikna bha da kaba thmu ïa ki jaka pynher ïa ki lehnoh kum ka jingïakhun pyrshah ïa ka jingshah thombor ha Pahalgam ha ka 22 tarik Ïaïong, kaba la pynïap ïa 26 ngut ki briew, kiba bun ki dei ki nongjngohkai pyrthei.
Hadien katto katne kynta ba la mynjur ban pynsangeh ïa ki kam shipai, ka New Delhi ka la kynnoh ïa ka Islamabad ba ka la pynkheiñ ïa kane ka jingïasngewthuh jingmut.
Ha ka jingïakren bad ki lad pathai khubor ha ka por miet, u Foreign Secretary u Vikram Misri u la kyntu ïa ka Pakistan ba kan tuklar bha ïa kine ki jingpynkheiñ aiñ.
Ha kajuh ka por, u Omar Abdullah u la pynbna ban ai jingïarap pisa kaba T.10 lak na ka bynta uwei pa uwei u briew uba ïap ha ka jingshah siat bom sha shiliang pud.
Ka jinglong jingman ka dang sahkut namar ba ki dukan ha ka nongbah Jammu ki la khang ha ka shisngi hynrei ki la plie biang hadien ka jingpynbna sangeh ïasiat.
Ki pulit ki la pynmih ïa ki Helpline na ka bynta ka jingshngaiñ jong ki paidbah bad ki la ai jingmut ban husiar pyrshah ïa ki kam ne ki tiar kiba suba sniew.
