Bhubaneswar, Jymmang:
Ka seng BJD bad ka Congress jong ka jylla ha ka Sngi U Blei, ki la buh jingkylli halor ka jingpynbna ïa ka rai sangeh ïasiat hapdeng ka India bad ka Pakistan da u President jong ka US Donald Trump bad ki la ong ba ïa ka ri, ym dei ban shah pynbor ha kano kano ka kynhun kaba lai.
U nongïalam ba rangbah jong ka BJD bad Myntri barim ka Prasanna Acharya u la ong, “Dei tang ka India kaba bat ïa ka hok ban shim ïa kum kine ki rai bad ki jingpynbna.Ka India kam dei ban pyndem hapoh ka jingpynbor na kano kano ka ri, la ka long ka USA ne ka Russia, namar ba ka dei ka ri kaba laitluid, kaba sngew sarong bad kaba lah ban leh.”
Uwei pat u nongïalam ka BJD bad u Myntri barim u Arun Sahoo u la ong ba ka sorkar pdeng ka dei ban shim ïa ki seng pyrshah ha ka jingshaniah halor ka jinglong jingman kaba mynta ha ka thma. U la ong ba hadien katto katne kynta ba la pynbna ïa ka jingsangeh ïasiat, la pyndonkam da ka jingsiat thymmai bad ka jinghiar thma da ki Drone da ka Pakistan bad ka sorkar pdeng ka dei ban pynshai ïa ka jinglong jingman.
U Sahoo u la pynpaw biang ïa ka jingkyrshan jong ka BJD ïa ki sienjam ba la shim da ka Centre ban pynduh jait ïa ki kam lehnoh na ka ri. U la bynrap ruh ba ka jinglong jingman kaba mih ka la pynpaw shai ruh ba baroh ki jaitbynriew ki la ïeng tylli bad ka ri ha kine ki kynta jong ka jingeh.
U President ka Odisha Pradesh Congress Committee (OPCC) u Bhakta Charan Das ruh u la buh jingkylli halor ka jingpynbna ban sangeh thma da kawei ka ri kaba lai. U la ong ba ka sorkar jylla ka dei ban khot ïa ka dorbar kyrpang jong ka Assembly khnang ba baroh ki sengbhalang kin pynpaw ïa ka jingïatylli bad ka sorkar pdeng ha ka jingïakhun pyrshah ïa ki kam lehnoh.
