U S. N. Syiemlieh
Ex – Acting Sirdar
Dwara Nongtyrnem Sirdarship
Lada ka kmie bad u kpa ki pynpaw ïa ka jingïaieit ïa burom mar kylliang, kata ka long ka nuksa kaba biang tam ïa ki khun, ba kin ieit bad burom ïa la ki jong ki kmie ki kpa. Naba ki kmie ki kpa ki long ka nuksa ïa la ki khun, bad lada ka kmie bad u kpa kim ïa ieit bad burom iwei ïa iwei, ki khun ruh kin long hi kumta. Haba ka kmie kam burom ïa la u kpa ki khun, phi tharai ba ki khun kin burom ïa la u kpa ? Em. Lada u kpa um burom ïa ka kmie phi tharai ki khun ki burom ïa ka kmie ? Em.
Lada ka longïing longsem ka bym don ka jingïaieit bad burom ka kmie bad u kpa, kata ka longïing longsem kam long kaba skhem, khamtam ka kmie. Lada u kpa uba la shim jingkitkhlieh ban pynlong briew manbriew bad ban pynbit pynbiang ïa ka ïing ka sem, ba kan long kaba bit ba biang ïa ki khun ki kti, ïa ka lawei jong ki pynban ka kmie wat la katta u kpa u la shim jingkitkhlieh, pynban ka longkmie kam ñiew burom shuh ïa la u jong u kpa haba um don bor shuh naba u la kham tymmen. Te phi tharai kaba kum kata ka longïing kan neh junom, em da lei lei kam lah ban neh junom, kan kyllon. U kpa bapli wat ka kmie kam ñiew burom shuh, um banse wat la ka por kam dei shuh u hap ban ïehnoh, ka kham bha ban sah marwei ban ïa kaba ngan shah ñiew beiñ ha ka kmie ki khun. Wat ka kmie ruh lada u kpa um ñiew briew shuh ïa ka, kam banse ban ïehnoh ïa la u kpa, ka kham bha ban shong marwei.
Shisien ba la mih ka jingïa ñiewbeiñ iwei ïa iwei, u kpa bad ka kmie, to tip ba kata ka longïing ka la jot la pra. Lada ka longïing ka kwah ban long kaba skhem, dei tang ka jingïaieit bad burom mar kylliang hapdeng ka kmie bad u kpa. La duk ne riewspah kam pher. Lada la klet ïa ka jingïaieit bad burom mar kylliang kata ka jot.
