New Delhi, Jymmang:
U Myntri Rangbahduh ka India, u Narendra Modi, ha ka Sngi Nyngkong u la pynbna ba ka ‘Operation Sindoor’ kam pat shym la kut satia, hynrei ka dang shu sangeh shipor namar ka jingpynbeit ia ki kam- ki jam bad ban peit-thuh kaei ba ka Pakistan ka don ban tyrwa haba iadei bad kane ka kam. Hynrei, u Modi ha kane ka kynti, u la maham tyngeh ia ka Pakistan ba lada ka dang kwah ban sah ka kyrteng kum ka ri ‘Pakistan’, kam bit ban tam na kaei kaba la iakut bad kam bit ban ai jingkyrshan ia ki lehnoh jong ka namar ka India kam shym don daw ne pynthut eiei ia ka Pakistan hynrei ka iarap ban tehlakam ia ki kam thombor jong ki lehnoh ka Pakistan, kiba ka Pakistan hi da lade kam lah ban tehlakam.
Kumta ruh u Modi u la ong ba ka Pakistan ka dei ban sngewthuh ba ka jingiasiat kam pat kut satia, hynrei ka dang sangeh shipor ban peit-kai aiu ka Pakistan kan leh ia kitei ki ktem lehnoh bad ki kynhun lehnoh kiba don hapoh u pud- u sam jong ka, ha kaba ka Pakistan ka la kular ba kan shim jingkitkhlieh ban tehlakam ia kitei ki lehnoh jong ka.
Shuh shuh ruh u Myntri Rangbahduh ka India u la ong ba ka India nangne shakhmat kan peit-thuh bad bishar bniah bha ia ka jinglong- jingman bad ka rukom leh jong ka Pakistan thik- pa- thik bad tang shu iohi ba ka Pakistan ka pynkheiñ ia ki soskular lane ka phai dien na ka jingkular jong ka, ka India kan bteng biang ia ka ‘Operation Sindoor’ bad kan ai ruh da ka jubab kaba kham tyngeh shuh-shuh khamtam lei ia kito ki ktem lehnoh kiba don ha kylleng sawdong jong ka ri Pakistan.
