Hyderabad, Jymmang:
Hadien ba la jia ka jingshah pynïap ha Pahalgam bad ka jingjur jong ka jingïakynad hapdeng ka India bad ka Pakistan, ki nongjngohkai pyrthei ki la pynsangeh bad pynkynriah por na ka bynta ka jingleit shangkai ne pynleit por ïa ka shuti jong ki ha ka por Lyiur.
Ki tnad ba dei khmih ha ka leit jingleit bad ki nongleit jingleit kiba ju leit kai ki ïathuh ba ki jaka kum ka thaiñ Shatei-Mihngi, Kashmir, bad kiwei kiwei ki jaka shang shuti ba pawnam mynta la shim ba kim long kiba shngaiñ.
Ka sorkar India ka la pynmih ruh ïa ka jingbthah kaba kyntu ïa ki nongjngohkai pyrthei ba kin kiar na kaba leit sha ki jylla khappud namar ka jingeh kaba la don mynta.
Ki tyllong khubor na ki tnad leit jingleit ki pyni ba ki jaka kum ka Srinagar, Leh, Manali, Shimla, Gangtok, Darjeeling, Jaipur, bad Udaipur ki long kiba bun ki jingdawa ha ka por lyiur.
Hynrei palat 90 percent ki nongjngohkai pyrthei ki la pynsangeh noh ïa ki jingleit jingwan jong ki, katba 5 haduh 10 percent ki la pynsangeh shwa shipor ïa ki jingthmu jong ki, da kaba ap ïa ka jingpynbeit ïa ki jingeh kiba don mynta.
Ki nongleit jingleit kiba rit ki jied ïa ki jaka ba Shathie kum ka Goa, Coorg, Munnar, bad Chikmagalur.
Ki nongmihkhmat jong ki Holiday Company ki ong ba ki jingpynsangeh ki ïaid ruh sha ki jylla khappud bad ki Union Territory kum ki Andaman bad Nicobar Islands bad ka Lakshadweep namar ka jinglong jingman kaba long kum ka thma.
Nalor kata, ki don ki nongleit jingleit kiba pynslem ïa ki jingleit jingwan ba lyngkot shabar ri, da kaba kdew ïa ka jingsngewkhia halor ka jinglah ban pynthut ïa ki liengsuiñ ne ki jingkhanglad ha ki ri kiba shah ktah ha ka jingïakynad hapdeng ka India bad ka Pakistan.
U Papili Bharat Reddy uba dei u nongseng bad CEO ka Gogaga Holidays Pvt Ltd u la ïathuh ha ka TNIE ba kiba bun ki nongjngohkai pyrthei napoh ri ki la pynsangeh noh ïa ka jingthmu jong ki ha ka por Lyiur sha ki jaka kum ka Srinagar, Shimla, Manali, Gangtok, Leh, bad Kashmir hadien ka jingjia ha Pahalgam.
Ka bynta kaba rit ka la pynkynriah noh ïa ki jingleit jong ki haduh ba ka jinglong jingman kan da jai jai.
U Papili Bharat u la bynrap ba ki nongleit nongwan ruh ki artatien ban leit jngoh ïa ki katto katne ki dewlynnong jong ka ri India bad ki jylla khappud.
Ha ka jaka kata, ki nongjngohkai pyrthei napoh ri ki wad ïa ki jaka jngohkai pyrthei kum ka Thailand, Vietnam, Singapore, Malaysia, Dubai, Japan, Baku, bad Bali.
U K Amruth Kumar uba dei u nongïasaid aiñ na Hyderabad u la ong ba u la thmu ban leit sha Leh bad Manali lai bnai mynshwa, hynrei mynta u la pynsangeh noh namar ka jinglong jingman kaba mynta.
Mynta u dang pyrkhat ban leit shuti sha Vietnam ne sha kawei pat ka jaka ba shabar ri.
