Srinagar, Jymmang:
Baroh ki skul bad kolej ha Kashmir, lait noh kito kiba don ha ki distrik khappud, ki la plie biang ha ka sngi Ba-ar, hadien ba la sangeh ka jingïaleh pyrshah hapdeng ka India bad ka Pakistan, ong ki heh sorkar.
Ki jaka pule ha Kupwara, bad ha Baramulla distrik, bad kito kiba don ha Gurez sector jong ka Bandipora, kin dang khang ïa mynta, ki la ong. Katkum ka jingong jong ki heh sorkar, ka Kashmir University, kan sdang biang ïa ki jinghikai ha ka sngi Balang.
Ki skul, ki kolej bad ki skulbah kiba don ha ka Union Territory ki la khang khyrdep shipor ha ka taïew ba la dep na ka daw jong ka jingïakynad shipai hapdeng ka India bad ka Pakistan.
Hynrei, ha ka jingsangeh jong ka jingïakhun, ka sorkar Jammu & Kashmir ha ka lah sngi U Blei, ka la hukum ban plie biang ïa ki jaka pule ha kylleng ka Union Territory, lait noh tang kito kiba don ha ki distrik khappud.
