Hyderabad, Jymmang:
Ka Telangana Private Degree and PG College Management Association (TPDPMA) ha ka lah sngi U Blei ka la weng noh da kaba pynbna paidbah ïa ka jingïakhih kaba la neh mynta la sawphew sngi.
Kane ka long hadien ka jingpynthikna na u Chairman ka Telangana State Council of Higher Education u Prof V Balakista Reddy ba yn pyllait mardor ïa ka pisa na ka bynta ban siew ïa ka Reimbursement of Tuition Fees (RTF).
U Chairman u la ïakynduh ïa u Myntri Rangbah ka jylla u A Revanth Reddy bad u la rah ïa ka jingeh jong ka pisa RTF kaba dang sah-teng ha kine ki khyndiat snem ba la dep, da kaba pynpaw ïa ka jinglong jingman kaba sniew ha ka liang ka pisa tyngka jong ki kolej Degree bad PG ha ka jylla.
Hadien kane, u Myntri Rangbah u la bthah ïa ki heh kiba dei peit ba kin shimkhia mardor ban pynlait noh ïa ka pisa jong ka RTF hapoh lai sngi.
U Prof Balakista Reddy u la ong ba u Myntri Rangbah u la kyrpad ïa ki nongpynïaid jong ki kolej, ki trai ba ju shna ïing bad ki nonghikai ba kin ai ka jingïatreilang ban sdang biang ïa ki kam pule puthi kumba ju long.
Da kaba sngewskhem ïa ka jingpynthikna, ka TPDPMA ka la pynbna ba kan ïatreilang bad baroh ki skulbah na ka bynta ki eksamin Semester ban wan kiba la buh ban sdang ha ka 14 tarik u Jymmang.
Haba ïakren bad ka TNIE, u Bojja Suryanarayana Reddy secretary ka TPDPMA u la ong, “Ngi la ïoh jingpynthikna na u Chairman ba ïa ka pisa RTF kaba dang sahteng yn pyllait noh mardor, ngi la rai ban weng noh ïa ka jingïakhih bad ban pynlong ïa ki eksamin Semester kumba la buh.”
Lah ban kdew ba ha kine ki ar bnai ba la dep, ki trai kolej shimet ki la pynlong ïa ka dharna bad ki la pynlong ïa ki jingïalang ban pyrshah ïa ka jingpynslem ban pyllait pisa bad ki la khanglad ïa ki eksamin Semester, da kaba kdew ïa ka jingkiew dor kaba la pynlong ïa ki kolej ban shem jingeh ban pynïaid ïa ki kolej.
