Chennai, Jymmang:
Ka sorkar jong ka jylla Tamil Nadu ba la ïalam da u Myntri Rangbah ka jylla u M K Stalin ka la lam khmat ïa ka ri ha kaba pyntreikam ïa ki skhim na ka bynta ka jingbha jingmiat bad jingpynkupbor ïa ki kynthei ha kine ki saw snem ba la dep, la ong ka jingpynbna paidbah.
Ka jingpyllait ka la buh ïa ka thup kaba jrong jong ki lad ki lynti na ka bynta ka jingbha jingmiat jong ki kynthei.
Ka polisi jong ki kynthei jong ka jylla Tamil Nadu 2024 ka thmu ban pynduh noh ïa ka jingbym ïahap hapdeng ki kynthei bad ki shynrang, ban kyntiew ïa ka jingpynkupbor ïa ki kynthei ha ka liang ka ïoh ka kot, bad ban pynthikna ïa ka burom bad ka jingïaryngkat hapdeng ki kynthei bad ki shynrang.
Ka skhim shong bus khlem jingsiew na ka bynta ki kynthei ka la long kaba myntoi shibun.
Haduh mynta, 682.02 klur tylli ki kali khlem jingsiew la ïoh da ki kynthei, kynthup ïa ki briew kiba don jingduna ha ki dkhot met, bad ki la lah ban pynduna T.888 shibnai namar kane ka skhim.
Ki kynthei kiba heh bha ki long 1.15 klur ngut kiba ïoh T.1,000 shibnai lyngba ka skhim ai jingïarap ïa ki kynthei jong ka Kalaignar.
Ka sorkar ka dang shim khia ban pynïar ïa kane ka jingmyntoi sha baroh ki kynthei kiba dei hok kiba khlem pat ïoh.
Kiwei pat ki skhim ki kynthup ïa ka Pudhumai Penn Scheme ban ïarap ïa ki khynnah kynthei klas 6 haduh 12 kiba pule ha ki skul sorkar bad ki skul ba ïarap da ka sorkar ban leit pule sha ki jaka pule kiba kham shalor, ki hostel na ka bynta ki kynthei kiba trei, ka jingpynkiew ïa ka ram na ka bynta ki kynthei ha ki kynhun ïarap ïalade, ka jingbuh kyrpang 40% na ka bynta ki kynthei ha ki kam sorkar, ka jingpynbiang ïa ki lad kha khun na ka bynta ki kynthei, ki skhim ba pynbiang ïa ki lad seng kam bad ka jingthung ïa ki kynthei Oothuvaar ha ki temple, napdeng kiwei pat.
