Bhubaneswar, Jymmang:
Ka sorkar Odisha ka thmu ban pynkhlaiñ ïa ka Rath Yatra mynta u snem sha ka kyrdan jong ka Maha Kumbh bad ka dang trei ïa ki bor pahara kiba heh na ka bynta kane ka tamasa kaba man la u snem kaba khring ïa ki nongwan mane kiba bun.
Da kaba shim ïa ka nuksa na Uttar Pradesh kaba la pynlong ïa ka Maha Kumbh da kaba jop, ka sorkar jylla ka dang peit ïa ka jingïalang kaba heh na ka bynta ka tamasa kali jong u Lord Jagannath kaba man la u snem.
Ki Myntri Rangbah jong ki san haduh hynriew tylli ki jylla ba la synshar da ka BJP kin shah khot ha kane ka Rath Yatra lait na ki kynhun Myntri sorkar pdeng, la ïathuh ki tyllong khubor. Kane kan khring shuh shuh ïa ki nongwan sha kane ka yatra.
Da kaba shim ïa ka jingïakynad hapdeng ka India bad ka Pakistan, la bthah ïa ki pulit jong ka Odisha ban pynkhlaiñ ïa ki lad jingïada namar ba ka Rath Yatra kan long ka jing-leh niam kaba heh tam hadien ka jingïakynad hapdeng kine ki ar tylli ki ri ba marjan.
“Nalor kane, ka President Droupadi Murmu ka lah ruh ban leit sha Puri ban ïashim bynta ha kane ka jinglehniam kaba dang pynbeit bniah bad ka jingpynkhreh ïa ka jingïada ka dang don ha ka kyrdan ba khatduh,” ong ki tyllong khubor ha ka Lah Sngi U Blei. Ka Rath Yatra kan sdang naduh ka 27 tarik Jylliew.
Ki tyllong khubor ki la ïathuh ba ki pulit jong ka jylla ki thmu ban kyrpad ïa ki tnad pdeng ban buh ïa ki kor ïada ha ka jingkhmih lynti ban khanglad ïa ki liengsuiñ khlem shong briew.
Ki pulit kin pyndonkam ruh ïa la ki jong ki drone, kynthup ïa saw ngut na ki kiba ap pahara ïa ki rud duriaw ha Puri.
Yn buh palat 300 tylli ki CCTV kiba pyndonkam da ka AI ban pynïaid ïa ka leit ka wan, ban tehlakam ïa ki paidbah bad ban peit ïa ka jingleit jingwan jong ki lehnoh bad ki riew pyrshah ïa ka imlang sahlang.
“Ki pulit ka jylla kin lum jingtip na ki tnad pdeng halor ki riew pyrshah ri bad ïa ki dur jong ki yn buh ha ka jingshakri jong ka kamra pynïaid ba la pynïasoh lang ha Puri ban ithuh mardor ïa ki,” ong ki tyllong khubor.
Ka sorkar jylla ka thmu ban pynbun ïa ka jingpyndonkam ïa ki bor pulit jong ka bad jong ka tnat Central Armed Police Forces (CAPF) na ka bynta kane ka jingthmu. Kham bunsien, kumba 200 tylli ki kynhun pulit bad san tylli ki kynhun jong ki CAPF, kynthup ïa ka Rapid Action Force (RAP) ki ju pyndonkam ha ka por ba pyndonkam ïa ki kali kulai hynrei ha kane ka kynti, ka jingdon ka lah ban long ha ka liang kaba kham heh, la ong ki tyllong khubor.
Ha katei ka sngi, u DGP u Yogesh Bahadur Khurania u la pynïaid ïa ka jingïalang ba hakhliehduh ban bishar bniah ïa ki jingpynbeit ïa ka jingïada na ka bynta ka Rath Yatra.
Ha kane ka jingïakynduh la don lang u Director (intelligence) u R.P Koche, u ADG Modernisation u SK Priyadarsi, u ADG jong ka tnad pahara rud duriaw u Arun Bothra, u ADG jong ka Law and Order u Sanjay Kumar, u Transport Commissioner u Amitabh Thakur.
U Khurania u la ong, kum shi bynta ban pynkhlaiñ ïa ki lad jingïada, ki pulit jong ka Odisha ki la pynïaid ïa kawei ka kali Armored ‘Rakshak’ ha Puri.
Katei ka kali kaba lait na ki kuli, kaba la pynïaid da ka Special Operations Group (SOG), ka dei kaba la pyndap da ki tiar pynïadei kiba stad bha bad ka lah ban kit ym duna ïa ka saw haduh san ngut ki Commando. La shna ïa u na ka bynta ki jingjia ba don jingïaleh, u ‘Rakshak’ u lah ruh ban buh ïa ka Machine Gun ka barit. Kan don ha ka jingpynïaid jong ki pulit Puri baroh shisnem.
“Ngi don ha ka jingpynkhreh kaba bha bad yn sa pynbeit ïa ki lad ki lynti kiba biang na ka bynta ka Rath Yatra. Ngin don ha ka jinglong ba la pynkhreh pura ban leh ïa kino kino ki jingjia ba kyrkieh”, la ong u Khurania ha kawei na ki kotkhubor.
