Srinagar, Jymmang:
Ki bor pahara ki la pynlong ïa ka jingkerkut bad ka jingleit khynra ha ka thaiñ Nader Tral jong ka Awantipora ha Pulwama hadien ba ki la ïoh jingtip shaphang ka jingdon jong ki lehnoh.
Ka jingïasiat ka la mih hapdeng ki bor pahara bad ki lehnoh ha ka thaiñ Nader Tral jong ka Pulwama distrik ha Jammu & Kashmir ha ka step jong ka sngi Palei.
Katkum ka jingong jong uwei u heh pulit, ki bor pahara ki la pynlong ïa ka jingkerkut bad jingkhynra ha Awantipora, South Kashmir, hadien ba ki la ïoh ïa ki jingtip ba kyrpang na ka liang ki bor syntiat shaphang ka jingdon jong ki lehnoh ha kane ka jaka.
“Ka jingïasiat ka la sdang ha Nader, ha ka thaiñ Tral jong ka Awantipora. Ki pulit bad ki bor pahara ki dang don ha ka kam. Ki jingtip ba kham bniah kin sa bud” la thoh ha ka rynsan’X’ da ki pulit ka Kashmir. Ki heh pulit ki la ong ba ka don ka jingma ba don arngut ki lehnoh ha katei ka jaka.
Ka jingkhynra ka la wanrah ïa ka jingïasiat kaba markylliang hadien ba ki lehnoh ki la siat ïa ki shipai, kiba la pynphai kylla, la ong uwei u heh pulit. Ka jingïasiat kaba markylliang ka dang ïaid shakhmat, bad la ap ïa ki jingtip ba bniah, la bynrap biang une u heh pulit.
“Ha ka 15 tarik Jymmang 2025, katkum ka jingtip ba kyrpang na ka kynhun Int, la pynlong ïa ka jingkhynra bad wad bniah da ki shipai India, ki pulit jong ka J&K bad ki pulit jong ka Srinagar Sector CRPF ha Nader, Tral, Awantipora. ka jingïasiat kaba jur ka la jia. Ka jingtreikam ka dang ïaid shakhmat,” la ïathuh ka Chinar Corps jong ka kynhun shipai ka tnat Indian Army ha ka rynsan X.
Kane ka jingïasiat kaba thymmai, ka la jia hadien ar sngi, ba lai ngut ki lehnoh jong ka Lashkar-e-Taiba, ki la shah pynïap ha ka jingïasiat ha Shopian, South Kashmir, ha ka sngi Ba-ar ha Jammu & Kashmir. Kine ki lehnoh ki kynthup ïa u heh duh jong ka kynhun LeT, u Shahid Kuttay, ong ka khubor jong ki heh sorkar.
Uwei u heh ophisar u la ïathuh ba ïa ka jingker kut bad ka jingleit thwet kaba jur la pynlong da ki shipai ha ka khlaw Shukroo jong ka Keller ha Shopian ha ka por mynstep jong ka sngi Balang, hadien ba la ïoh ïa ka jingtip kaba bniah shaphang ka jingdon jong ki katto katne ngut ki lehnoh.
Ki pulit ki la ïathuh ba ka jingkhynra ka la kylla long ka jingïakynduh hadien ba ki lehnoh ki la siat ïa ki bor kiba la pynphai kylla.
Ha ka jingïasiat kaba markylliang, lai ngut ki lehnoh ki la ïap namar ba la ïohi ïa ki met jong ki ha ka jaka ba sañium bha ba thung jhur ha ki jaka khlaw, la ïathuh ki heh sorkar.
Uwei u heh pulit u la ithuh ïa arngut ki lehnoh ba la tip kyrteng kum u Shahid Kuttay bad u Adnan Shafi.
Ka jingwadbniah ban ithuh sa ïa uwei pat u lehnoh ka dang ïaid shakhmat.
