Bhubaneswar, Jymmang:
Ka Odisha ka la sakhi ïa ka jingkiew ha ka ting khun ha une u snem ba la dep, ha kaba 287 ngut ki khynnah kiba la sah khunswet, kiba la shah iehnoh ne kiba la aiti noh ki la shah wan shim ban ting khun ha u snem 2024-25.
Katkum ka jingkheiñ jong ka Central Adoption Resource Authority (CARA) jong ka Ministry of Women and Child Development, ki la don kham bun ki kynthei kiba la shah ting ban ïa ki shynrang. Katba la don 151 ngut ki khynnah kynthei kiba la shah ting khun bad ki shynrang pat ki la don tang 136 ngut.
Napdeng kine, 259 ngut kum kine ki khynnah (122 ngut ki shynrang bad 137 ngut ki kynthei) la ting hapoh ka ri bad 28 ngut (14 ngut ki shynrang bad katjuh ki kynthei) ki la shah sumar ne shah ri shabar ri. Katba ka Maharashtra ka dei kaba bun eh ki khynnah kiba shah ting kumba 849 ngut, ka Odisha ka wan ha ka kyrdan kaba san ha ka thup hadien ka Tamil Nadu (465), West Bengal (328) bad Karnataka (306).
Ha u snem 2023-24, ka jingdon jong ki jingshim khun – hapoh bad shabar jong ka ri – na Odisha ka long 259. Ki don 33 tylli ki kynhun Specialised Adoption Agencies (SAA) hapoh ka tnad WCD ha ki 28 tylli ki distrik ha kaba ki khynnah ki la shah ting khun.
Ki heh sorkar ki la ong ba ka por ap ban shim khun katkum ka aiñ Juvenile Justice (Ka jingsumar bad jingïada ïa ki khynnah) ka la hiar bha haba ïanujor bad ki snem ba la dep ha kaba ki nonglum khajna mynta ki don ïa ka bor ban rai ïa ki kmie ki kpa kiba shim khun. Ka aiñ ka bthah ba ïa ki mukotduma ban shim khun dei ban pynbeit noh hapoh ar bnai naduh ba la thep ïa ka aplikeshon da ki kmie ki kpa kiba kwah ban shim khun.
Hynrei ka jingshim khun ïa ki khynnah kiba donkam kyrpang ka dang duna bha, la ong ki nongïakhun ban pynïoh ïa ka hok longbriew manbriew. Kane ka long namar ba ki khynnah kiba don jingduna ha ki dkhot met ki donkam ïa ka jingkyrshan ba kham bun namar ki jingeh ha ka met, ka jingroi bad ka jinglong.
Ha ka liang kaba pyrshah, ka Odisha ruh ka don shibun ki khynnah ha ka kynhun ban ap ïa ka jingwan shim ne ting khun. Shwa ïa kane, haba jubab ïa ka jingkylli ha Rajya Sabha, ka Myntri jong ka sorkar pdeng jong ka jylla kaba dei khmih ïa ka tnat Women and Child Development ka Savitri Thakur ka la pyntip ba ki don 2,321 ngut ki khynnah kiba dang ap ïa ka jingwan shim ne ting khun ha kylleng ka ri.
Ki khynnah kiba bun eh ha ka Legal Adoption Pool ki long ha West Bengal kaba don 309 ngut, bud sa ka Maharashtra kaba don 261 ngut, ka Odisha kaba don 225 ngut, ha Bihar kaba don 205 ngut bad ha Telangana kaba don 197 ngut.
Ki heh jong ka tnad State Adoption Resource Agency (SARA) ki la ong ba kiba bun na ki kmie ki kpa kiba kwah ban shim khun ki dang ïai bteng ban kham jied ïa ki khynnah kiba kham rit. Ki khynnah ha ka rta 0 haduh 2 snem ki kham shahjied ban shim khun hynrei ka jingbun ki samla shynrang bad kynthei ki don ha ka kynhun shim khun jong ka jylla.
