Chennai, Jymmang:
U Myntri Rangbah ka Tamil Nadu, u M K Stalin, ha ka Sngi U Blei, u la kyntu ïa ki para Myntri Rangbah na phra tylli ki jylla kynthup ïa ka West Bengal ba kin ïeng tylli ban pyrshah ïa ka jingphah jong u President sha ka Supreme Court halor ki por ba la buh na ka bynta u President bad u Lat halor ki Bill bad u la bat ïa ka buit aiñ kaba ïatreilang.
U Stalin, uba long ruh u President jong ka DMK kaba synshar ha Tamil Nadu, u la ong ba la tip bha ba ïa ka bor ai jingmut jong ka ïingbishar ba hakhliehduh ym lah ban pyndonkam ne pyndonkam haba ïa ka mat ba la kdew la dep rai da ka jingpynbna ba donbor jong ka ïingbishar.
“Hynrei, ka sorkar BJP ka la ïaid shakhmat ban wad ïa ka jingpynshisha, kaba kdew ïa ka jingthmu ba sniew jong ki,” u la kynnoh. U la kyrpad ïa ki Myntri Rangbah jong ki jylla bym dei kiba la synshar da ka BJP ban pyrshah ïa kane ka jingpynshisha ba la pan da u President ha khmat ka ïingbishar ba ha khlieh duh.
Haba thoh sha ki, ha ka shithi kaba la thoh ha ka 17 tarik u Jymmang, u la ong: “Ngi dei ban pynwandur ïa ka buit aiñ kaba ïadei hakhmat ka ïingbishar bad ban pyni ïa ka phang kaba ïatylli ban pynneh pynsah bad ïada ïa ka jinglong tynrai jong ka Riti Synshar, kumba la pynskhem da ka Kashari ba ha khlieh duh ngi ha ka jingbishar ba pawnam jong ka. Nga khmih bniah ban peit ïa ka jingïaid shakhmat jong ka jinglah ban tuklar kaba mardor bad ka jingtuklar kaba shimet jong phi halor kane ka bynta kaba kongsankongsan.”
Nalor ka West Bengal, u Stalin u la thoh shithi sha ki Myntri Rangbah jong ka Karnataka, Himachal Pradesh, Telangana, Kerala, Jharkhand, Punjab bad Jammu & Kashmir.
U Myntri Rangbah ka Tamil Nadu u la ong ba u President Droupadi Murmu, hapoh ka jingai jingmut jong ka sorkar pdeng, u la buh ïa ki 14 tylli ki jingkylli ha ka Supreme Court, katkum ka Article 143 jong ka Riti Synshar ha ka 13 tarik, Jymmang, 2025.
Wat la ka jingkdew kam shym la kdew kyrpang ïa kano kano ka jylla ne ka jingbishar, hynrei ka jingthmu jong ka ka long ban buh jingkylli ïa ki jinglap halor ka aiñ bad ka jingbatai ïa ka Riti Synshar ba la ai da ka Ïingbishar bahakhliehduh ha ka mukotduma jong ka jylla Tamil Nadu pyrshah ïa u Lat ka Tamil Nadu. Kane ka jingbishar kaba pawnam kam dei tang na ka bynta ka Tamil Nadu hynrei na ka bynta baroh ki jylla namar ka pynskhem ïa ka rukom synshar paidbah bad ka jingsam ïa ka bor hapdeng ki jylla bad ka Synjuk, kumta ka khanglad bha ïa ka jingkhanglad ia ki aiñ ba la thaw da ki ïingdorbar thaw aiñ jong ki jylla ba la jied da ka synshar paidbah da u nongshah thung jong ka seng bad u nongmihkhmat bym shym la jied – u Lat.
Ka sorkar pdeng ba la ïalam da ka BJP ka la pyndonkam ïa ki Lat ban khanglad bad pynthut ïa ka jingtreikam jong ki jylla ba la synshar da ki liang pyrshah. Ki pynslem palat ïa ka jingmynjur ïa ki Bill, ki khanglad ïa ka jingmynjur khlem ki daw kiba biang jong ka riti synshar ne aiñ, ki shong halor ki File ba man ka sngi bad ki hukum sorkar ba la phah ban soi, ki tuklar ha ki jingthung kam ha ki kam kiba kongsan bad ki la pyndonkam bakla ïa ka kyrdan jong ki kum u Chancellor jong ki skulbah ban pynlong saiñ pyrthei ïa ki jaka pule.
“Ki la lah ban leh kumta da kaba shim kabu ïa ka jingshisha ba ka Riti Synshar ka sngap jar ha ki katto katne ki mat, namar ki nongthaw ia ka Riti Synshar ki shaniah ba kito kiba bat ïa ka kam kaba heh ha ka riti synshar kin leh katkum ka akor jong ka Riti synshar.” Dei ha kane ka phang ba ka Supreme Court ka la pynmih ïa ka rai kaba kongsan ha ka mukotduma jong u Lat ka TN.
“Mynta kane ka jingbishar kan pynthikna ba ka Sorkar Pdeng kan ym pynthut be-aiñ ïa ki Sorkar Jylla ban pyndep ïa ki kam bad ki jingkitkhlieh jong ngi hapoh ki bynta ba la ai ha ngi katkum ka Riti Synshar.”
Ka paw shai ba ka BJP ka pyrshang ban pynthut ïa kane ka jingbishar, kaba lah ban pyndonkam kum ka nuksa da kiwei pat ki jylla haba ïakynduh ïa u Lat uba skhem.
Ka sorkar BJP ka la ai jingmut ïa u President ban wad ïa ka jingpynshai hakhmat ka Supreme Court bad ka dei ka buit, la kynnoh u Stalin.
