Hyderabad, Jymmang:
Ki shipai pahara ki la khanglad ïa ka jingthmu thombor da ki kam pyntriem jong ki lehnoh ha Hyderabad jong ka Telangana ha ka Sngi U Blei bad la kem ruh ïa ar ngut ki briew kiba la suba ba ki thmu ban pynbthei bom ha katei ka nongbah.
Katkum ka jingïoh khubor, la ong ba kitei kiba shah kynnoh, kiba la thmu ban pynbthei bom ha katei ka nongbah, ki dei kiba la tip kyrteng kum u Siraj Ur Rehman (290 bad u Syed Sameer (28).
La ngeit ba kine kiba shah kynnoh ki don ka jingïadei bad ka kynhun jong ka ISIS kaba treikam shabar jong ka Saudi Arabia, la ïathuh ka tyllong khubor, kaba la wan na ki heh sorkar. Kitei ki arngut kiba la shah kem, ki don mynta ha phatok bad shen yn sa ïalam ïa ki hakhmat ka ïingbishar.
Kine ki jingshah kem ki dei na ka jingtreilang kaba heh bha da ki kynhun pyrshah syntiat jong ka Andhra Pradesh bad ki pulit jong ka Telangana, kaba la sdang hadien ba la ïoh jingtip na ki bor syntiat. La kem nyngkong ïa u Rehman ha Vizianagaram jong ka Andhra Pradesh. Ka jingtohkit jong u, ka la ïalam ïa ki bor pynïaid sha u Sameer, uba la shah kem tang hadien katto katne por ha Hyderabad.
Ha ka jingkhynra ïa ki jaka ba don jingïadei bad kitei ki nongshah kynnoh, ki pulit ki la ïoh ban kurup ïa ki tiar pynbthei, kynthup ïa ka ammonia, ka sulphur, bad ka powder aluminium, na ki jaka jong kitei ki suba, la bynrap shuh shuh ki heh sorkar.
La ïathuh ba u Siraj, u la thied ïa ki tiar pynbthei ha Vizianagaram, kum shi bynta jong katei ka jingthmu, bad kitei ki arngut, ki la ïoh ïa ki jingbthah, na kawei ka kynhun ki ISIS, kaba don ha Saudi Arabia, kaba la kynnoh ba ka dei kaba ïalam lynti ïa ki, ba kin pynlong ïa ki jing thombor ha Hyderabad, la ïathuh ka tyllong khubor.
Katei ka jingthmu ba la lah ban khanglad, ka wan hadien katto katne taïew, ka jingthombor jong ki lehnoh, ha Jammu & Kashmir, ha Pahalgam, ha kaba 26 ngut ki briew, kiba lui-lui ki la shah pynïap ha ki lehnoh.
Kata ka jinghiar thma, kaba la thmu ïa ki nongwan jngohkai Hindu ha ka them Baisaran kaba itynnad bha, ka la wanrah ïa ka jingkynthoh kaba khlaiñ na ka liang ki shipai bad ki nongïalam na ka ri India, kaba kynthup ïa ka Operation Sindoor, ka jinghiar thma pynshitom beiñ kaba la thmu ïa ki khyndai tylli ki ktem lehnoh ha Pakistan bad Pakistan-Occupied Kashmir.
