Ngi rwai ngi ïaroh, ïathuhkhana, bad ngi duwai ban ïoh ïa u Blei. Hynrei ka long kaba eh ïa ngi ki briew ban ioh ïakynduh ïa u Blei. Namar ka jingïap ka wan ha ngi ki briew ka dei la ka jong ka pop ba ngi don. Ka jingïap ka dei ka pop. Kumta ngim lah ban lait na ka pop, wat lada ngi duwai bad ïaroh khlem pud sngi ïa u Blei. Kiba don ha ki niam ruh kim lait na ka pop ki bym don ha ki niam ruh kim lait na ka pop. Ka pop ne ka jingïap kam ju leh shiliang ïa phi ïa nga.
Ka rat naphang lin ïa baroh ki briew kiba bha ne kiba sniew kumjuh. Namar ym don u briew uba lah ban pynjrong ne pynlyngkot ïa la ka jingim. Kane ka dei ka bor jong u Blei na sha lyndet ka jingtip jongngi ki briew. Hooid ki don ki briew kiba sngewthuh bakla ba lada ngi duwai bad ïaroh ïa u Blei ngin lait na ka pop, namar u Blei un pyllait ïa ki. Hynrei em u Blei um ju thew shiliang ïano ïano ruh namar u Blei u ieit kumjuh ïa ngi ki briew la ki dei kiba ïong, kiba lieh bad kiba saw snieh doh. U Blei um pynïapher jait ba khraw ne jait ba poh. U Blei u ieit eh ïa ngi ki briew khlem da pan dor kaba rem ban hap siew ban ioh ïa ka hok. U Blei u pdiang kylluid ïa kiba khuid ha ka dohnud.
C. B. Iawphniaw
